Nga Ramiz TAFILAJ
Houston, Texas
14.10.2025
Me inxhinierin Davorin na lidhin bashkëpunimet profesionale dhe
angazhimet tona në komunitetet përkatëse. Biseda jonë ishte e hapur, miqësore dhe e sinqertë, e përqendruar kryesisht në situatën aktuale në Kosovë dhe Kroaci, por nuk munguan as analizat e thella për Serbinë dhe zhvillimet në rajon.
Të dy ndamë të njëjtin mendim: Serbia mbetet shteti më i padisiplinuar në Ballkan, madje edhe në Evropë. Luftërat e fundit që ajo i shkaktoi ishin të planifikuara dhe të drejtuara me qëllim shkatërrimin e popujve të tjerë të rajonit, për ta lënë veten si “shtetin e vetëm” dominues. Fatmirësisht, këto ambicie u ndalën nga qëndresa heroike e popujve të Ballkanit, në bashkëpunim me Evropën dhe Shtetet e Bashkuara të Amerikës.
Davorini foli me emocione për krimet serbe në Kroaci dhe për trimërinë e popullit kroat në luftën për liri dhe pavarësi. Ndërsa për Kosovën pranoi se dinte më pak, ndaj unë e njoha më gjerësisht me historinë tonë të qëndresës – me heroizmin e djemve dhe vajzave që u flijuan për liri, si dhe me rolin e madh të arkitektit të
pavarësisë së Kosovës, Dr. Ibrahim Rugova.
Meqë të dy kemi qenë studentë të Universitetit të Zagrebit, biseda rridhte natyrshëm dhe në frymë miqësore. Folëm hapur për dëmet, masakrat dhe politikat shkatërruese të regjimit serbo-rus, jo vetëm në Kosovë dhe Kroaci, por edhe në republikat e tjera të ish-Jugosllavisë.
Në fund të takimit, pasi Ing. Davorini më tha se kishte lexuar pak literaturë për Kosovën dhe shqiptarët, me kënaqësi i dhurova disa vepra të çmuara në gjuhën angleze, të botuara nga shtëpia botuese “JALIFAT Publishing.”
Ndër to ishin:
** veprat madhore të Jusuf Buxhovit – “Kosova” në tri vëllime dhe
“Maqedonia”;
** librat e Adem Lushajt – “Manastiri i Deçanit” dhe “Pasuritë Shoqërore”,
** si edhe “Krimet serbe në Kosovë – rasti i Deçanit” në anglisht dhe
kroatisht;
** nga Ibrahim Berisha, libri “Vdekja e kolonis” në anglisht;
** nga Ibrahim Kadriu, romani “Pjella e djallit” në anglisht;
** dhe nga Bajram Mehmetaj, libri “Lufta e ndyrë e Sigurimit Sekret
Jugosllav” në anglisht.
Ing. Davorini i pranoi me kënaqësi këto vepra, duke më premtuar se në takimin tonë të ardhshëm do të më sjellë edhe ai libra të autorëve kroatë që flasin për qëndresën dhe luftën e popullit kroat për liri.
Ishte një takim frymëzues, që dëshmoi edhe një herë se miqësia shqiptaro-kroate ka rrënjë të forta dhe një të ardhme të përbashkët, të ndërtuar mbi vlerat e lirisë, demokracisë dhe dinjitetit njerëzor.
