Katër persona janë plagosur gjatë një sulmi me thika në Hanau të Gjermanisë të martën në mbrëmje. Policia i ka arrestuar dy të dyshuar në lidhje me këtë rast.
Sipas policisë, një grup prej pesë deri në shtatë personave i ka sulmuar me thika disa kalimtarë të rastit. Raportohet se asnjëri prej të plagosurve nuk është në rrezik për jetën.
Katër personat e plagosur janë dërguar në një në spital të qytetit Hanau, i cili ndodhet afër Frankfurtit, në Gjermaninë perëndimore.
Autoritetet policore përmes një deklarate njoftuan se njëri nga të arrestuarit është një 23-vjeçar, ndërsa tjetri 29-vjeçar, shkruan “Reuters”, transmeton Telegramisot
Një zëdhënës i policisë tha se motivi i këtij sulmi ende është i paqartë, por shtoi se nuk ka shenja që ky rast mund të jetë i lidhur me vrasjen e nëntë personave me prejardhje të huaj në shkurt nga një person i armatosur.
Në një rast tjetër të rëndë në këtë qytet, një burrë 43-vjeçar me pikëpamje raciste i kishte qëlluar për vdekje nëntë persona në një kafene para se ta vriste nënë e vet dhe në fund veten.
