Gjenerali i NATO-s gjatë kohës së luftës në Kosovë, Wesley Clark, të mërkurën vazhdon dëshminë në Dhomat e Specializuara në Hagë.
Clarku ka nisur dëshminë e tij të hënën dhe e ka vazhduar edhe një ditë pas.
Gjatë dëshmisë së tij dyditore, Clarku ka thënë se nuk ka prova që Ushtria Çlirimtare e Kosovës është prapa spastrimit etnik të serbëve.
Ai ka shtuar se Hashim Thaçi nuk ka pasur kompetencë apo autoritet mbi ushtarët e UÇK-së.
“Flitej për një organizatë rezistence që kishte mbështetjen e NATO-s dhe ndjesia ishte që Serbia do të dëbohej… Mënyra se si i kam parë unë ngjarjet është se Çeku ka qenë personi përgjegjës… Thaçi ishte person ambicioz, i artikuluar, i prezantueshëm, por sa i takon kontrollit, pa diskutim se nuk ka pasur kontroll, absolutisht nuk e kam parë një gjë të tillë. Bëhej fjalë për grupe individuale që thjeshtë po luftonin për mbijetesën e tyre”, është shprehur ai.
