4,680 doza të vaksinës Pfizer pritet të arrijnë sot gjatë ditës në Kosovë.
Këtë e kanë konfirmuar për klankosova.tv nga Ministria e Shëndetësisë.
“Ministria e Shëndetësisë pret që gjatë ditës së sotme të arrijnë 4680 doza të Pfizer në Kosovë. Këto janë pjesë e asistencës prej 95 000 dozave që BE-ja i ka ndarë për Kosovën”, thuhet në përgjigjen e kësaj ministrie.
Disa ditë më parë, presidentja e Komisionit Evropian, Ursula von der Leyen, përmes një postimi në Twitter konfirmoi se 95 mijë doza të vaksinave kundër COVID-19 do të vijnë në Kosovë nga maj deri në gusht.
Deri më tani janë vaksinuar rreth 24 mijë qytetarë të Kosovës me 24 mijë dozat e vaksinave AstraZeneca, të cilat kishin arritur në Kosovë më 28 mars, që ishin dhuruar nga mekanizmi COVAX.
