Pas deklaratës së kryetarit të komunës së Vitisë, Sokol Haliti, se shkolla dhe çerdhja në Pozheran nuk janë ende gati për t’u përuruar për shkak të mungesës së pranimit teknik, ka reaguar edhe ministrja e Arsimit, Arbërie Nagavci.
Ministrja Nagavci ka anuluar vizitën e planifikuar në komunën e Vitisë, ku ishte paraparë përurimi i këtyre objekteve. Vendimi i saj erdhi si pasojë e gjendjes së papërfunduar të shkollës dhe çerdhes, të cilat nuk i plotësojnë kushtet për funksionim.
Në një njoftim të publikuar sot, kryetari Haliti ka dhënë sqarime të mëtejshme, duke theksuar se përkushtimi i komunës për përfundimin e projekteve është i pandërprerë, por pranimet teknike dhe standardet duhet të respektohen për sigurinë dhe cilësinë e objekteve.
“Është obligim i yni që çdo projekt të dorëzohet i gatshëm dhe sipas standardeve më të larta. Nuk mund të lejojmë që shkolla dhe çerdhja të përdoren pa përfunduar të gjitha procedurat e nevojshme. Kjo është për të mirën dhe sigurinë e fëmijëve tanë,” ka deklaruar kryetari Haliti.
Kjo situatë ka nxitur diskutime dhe reagime, ndërsa pritet që çështja të zgjidhet shpejt në mënyrë që këto institucione arsimore të jenë në shërbim të qytetarëve të Vitisë.
