Menaxheri i përfaqësueses së Kosovës, Bajram Shala, ishte pjesë e FC Prishtinës në udhëtimin e bërë në Gjibraltar, ka thënë se do të tentojnë të dëshmojnë çdo argument drejtuar UEFA-s, pas mos zhvillimit të ndeshjes ndaj Lincoln Red Imps në kuadër të Ligës së Evropës, pasi tetë lojëtarë të Prishtinës rezultuan pozitivë me COVID-19 pas testimit.
Në një intervistë të dhënë për faqen zyrtare të FC Prishtinës në Facebook, Shala tha se deri të hënën do ta dërgojnë lëndën në komisionin e etikës dhe disiplinës në shtëpin më të madhë të futbollit në Evropë, UEFA.
Shala mes tjerash thotë se duhet cekur të gjitha faktet, sidomos sakrifica që e ka bërë klubi me organizimin e një ekipi komplet të ri e që kjo sipas tij është dëshmi e jashtëzakonshme që Prishtina ka tentuar në çdo formë që ndeshja të përcaktohet në terren dhe jo në tavolinë.
“Absolutisht, deri sa kemi arritur që mos të merret vendimi në ditën e ndeshjes, e realisht krejt kjo ishte lufta që e kemi bërë, sepse praktikisht e kemi ditur që ishte e pamundshme të luhet, por që mos të kishte vendim nga UEFA, që mos të regjistrohej me rezultat zyrtar dhe të dërgojmë lëndën në komisionin e etikës dh disiplinës, për të cilën kemi afat deri ditën e hënë në ora 8 të mëngjesit. Duhet cekur të gjitha faktet, sidomos sakrifica që e ka bërë klubi me organizimin e një ekipi komplet të ri që është dëshmi e jashtëzakonshme që Prishtina ka tentuar në çdo formë që ndeshja të përcaktohet në terren dhe jo në tavolinë”.
Tutje, Shala ka thënë se deri te pezullimi i ndeshjes ka ardhur pas vendimit të marr nga autoritetet lokale në Gjibraltar, dhe jo nga UEFA.
“Nuk është e vërtet se si kanë aluduar vendasit që është vendim i UEFA-s, sepse ne e kemi të shkruar nga ana e delegatit vendimin që për pezullimin ndeshjes ka ardhur nga autoritetet locale”.
“Është e vështirë të prejudikojmë vendimin, por duhet bërë maksimumin për ta bindur UEFA-në, duke mos i lejuar asgjë rastit. Pastaj UEFA besojmë do të marr vendimin meritor për çka nuk duhet dyshuar. Por, ne duhet të cekim komplet historikun nga java e kaluar nga ndeshja e parë kur është dashur të zhvillohet. Dhe, Prishtina në çdo formë e ka dëshmuar që dëshiron të luajë duke krijuar ekip të ri e duke mos tentuar as të ankohet pas anulimit të ndeshjes së parë e duke mos kërkuar rezultat në tavolinë e siç po duket mjaft haptas ka qenë qëllimi i Lincoln-it”, tha Shala.
