Me dyndjen e qytetarëve të Kosovës nga të gjitha anët drejt Prishtinës, viteve të fundit rrugët e saj janë mbushur nga veturat. Përveç guzhmave në trafik, veturat e shumta, duke mos respektuar rregullat e komunikacionit janë bërë edhe kërcënim për banorët e Prishtinës. Jo rrallëherë, në aksidente brenda kryeqytetit, banorët e kanë pësuar fatalisht.
Kandidati për kryetar të Prishtinës, Daut Haradinaj, e ka prezantuar planin e tij të punës për masat që do t’i ndërmarrë me ta marr drejtimin e kryeqytetit, për ta evituar rrezikun nga aksidentet, përmes vendosjes së kamerave dhe radarëve automatik.
Vendosja e kamerave CCTV në të gjithë qytetin do të jetë një prej masave të para. Po ashtu, do të ndërtohet edhe një qendër e kontrollës qendrore nga vëzhgimi i këtyre kamerave. Plani i Haradinajt është që, duke filluar nga akset kryesore të kryeqytetit dhe më vonë në tërë territorin e komunës, të bëhet vendosja e këtij lloji të kamerave, me qëllimin që të ngritet niveli i përgjithshëm i sigurisë.
Po ashtu, vendosja e radarëve automatikë në të gjitha rrugët e kryeqytetit dhe dalje të saj, do të jetë masa tjetër që do t’i detyrojë ngasësit t’i drejtojnë makinat duke respektuar ligjet e komunikacionit. Radarët automatikë do ta masin shpejtësinë në vazhdimësi, duke i monitoruar dhe penalizuar ngasësit e papërgjegjshëm.
Daut Haradinaj është për çdo ditë në një lokacion të ndryshëm të Prishtinës, duke biseduar me qytetarë e banorë të shumtë të kryeqytetit. Ai, duket se i ka kuptuar me lehtësi dhe shpejtësi nevojat më primare të prishtinasve, ngase pritja që po i bëhet vetëm sa vjen e bëhet më e ngrohtë për çdo ditë.
Haradinaj, me programin e tij ka premtuar transformim të Prishtinës, nga një qytet që është bërë vështirë i banueshëm për banorët, në një qytet normal ku zhvillohet jeta në lagje dhe komunitet. Duke nisur nga infrastruktura, urbanizmi, ekonomia e deri te zbatimi i Ligjit për Kryeqytetin, programi qeverisës i Haradinajt kap një gamë të gjerë të punëve e projekteve për kryeqytetin.
