Drejtori i të ashtuquajturës Zyre Serbe për Kosovën, Marko Gjuriq u takua në Bruksel me të dërguarin e BE-së për dialogun Kosovë-Serbi, Mirosllav Lajçak përpara fillimit të një raundi të ri bisedimesh në nivel ekspertësh.
Më herët, koordinatori i Kosovës për dialogun, Skender Hyseni, u takua me përfaqësuesin e BE-së, pas së cilës të tria palët duhet të vazhdojnë bisedimet për personat e zhdukur dhe të zhvendosurit dhe çështje ekonomike.
Raundi i sotëm i dialogut midis Prishtinës dhe Beograditnë nivelin e ekspertëve pritet të përfundojë rreth orës 6:30 pasdite.
Ky është raundi i tretë i bisedimeve të ekspertëve që nga rifillimi i dialogut midis të dyja vendeve në mes të korrikut, kur presidenti serb Aleksandar Vuçiq dhe kryeministri i Kosovës, Avdullah Hoti u takuan në Bruksel me ndërmjetësimin e kryediplomatit evropian, Josep Borrell dhe Përfaqësuesit Special të BE Mirosllav Lajçak.
Sipas planit të ndërmjetësit të BE-së, pas bisedimeve në nivelin më të lartë politik, ekipet e ekspertëve diskutojnë detajet e temave të ngritura në nivelin politik.
“Për ne, cilësia është më e rëndësishme se shpejtësia. Ne jemi të përqendruar në arritjen e një marrëveshjeje gjithëpërfshirëse juridikisht detyruese, por kjo gjithashtu do të thotë se ajo do të nënshkruhet kur të merren vesh të gjitha çështjet e hapura midis Beogradit dhe Prishtinës”, tha zëdhënësi i BE-së Peter Stano për Tanjug, transmeton Klan Kosova.
Bisedimet e reja në një nivel të lartë politik midis Kosovës dhe Serbisë u njoftuan për fillimin e shtatorit, ka shumë të ngjarë të mbahen më 7 shtator, menjëherë pas bisedimeve midis dyja palëve në Washington, më 4 shtator.
