Ndihma të shumta qytetarët e Pejës po dhurojnë për personat të prekur nga tërmeti në Shqipëri, sidomos në Durrës e Thumanë si dy vendbanimet më të prekura nga dridhjet e sotme.
Solidarizimi i tyre është shprehur përmes një aksioni të organizuar nga “Lets do it Peja” dhe radio “Njëshi”.
Kryetari i organizatës “Lets do it Peja”, Uran Xheravina për KALLXO.COM tha se qytetarët e Pejës kanë shprehur interesim të madh për t’u dalë në ndihmë të prekurve në Shqipëri.
“Sot dhe nesër do të grumbullohen të gjitha ndihmat këtu në qendër të qytetit, pastaj do dërgohen në Shqipëri” tha Xheravina për KALLXO.COM.
Po ashtu Xheravina tha se qytetarët e Pejës kanë filluar në Spitalin Rajonal të Pejës të dhurojnë gjak për personat e prekur nga tërmeti.
