Një lajm i mirë vjen nga sektori ekonomik teksa qeveria e Kosovës i ka ofruar mbështetje sektorit privat.
Ministri në detyrë i Financave, Besnik Bislimi ka propozuar një pako për emergjencë fiskale.
Ai ka thënë se masat e marra për mbrojtje nga koronavirusi e kanë penguar prodhimin dhe ka rënie të aktivitetit ekonomik në tri kategori, tek qytetarët, komuniteti i biznesit dhe buxheti i shtetit.
“Kapaciteti është shumë i kufizuar dhe borxhi është i lartë për shkak të pa pagesave. Masat e Qeverisë edhe në aktivitetin ekonomik janë reflektuar me një automatizëm edhe te të hyrat doganore dhe tatimore nga 7.5 deri në 12.5%. Mund të ketë 200 milionë euro më pak të hyra”, ka thënë ai.
Bislimi ka thënë se Qeveria do t’i kompensojë kompanitë për pagat të cilat ka propozuar të jenë në masën e pagës minimale prej 170 euro.
“Mbulimin e shpenzimeve për paga për ata që janë afektuar në masën e pagës minimale prej 170 euro për dy muaj në vijim, maksimumi i mjeteve të alokuara në këtë masë janë 41 milionë euro.
Subvencionimin e qirasë deri në maksimumin e masës deri në 50% për ndërmarrjet e vogla dhe të mesme për dy muajt e ardhshëm. Për punëtorët e ndikuar nga pika 1, që marrin atë pagën shtesë nga qeveria prej 170, qeveria merr përsipër edhe mbulimin e kontributeve pensionale për dy muajt e ardhshëm”, ka thënë ai para mediave.
Lajmin e ka mirëpritur kryetari i Odës Ekonomike të Kosovës, Berat Rukiqi, shkruan lajmi.net.
Ai me anë të një postimi në Facebook ka thënë se ministria e Financave ka propozuar 41 milionë euro për paga, 12 milionë për qiratë, si dhe 20 milionë për likuiditet të kompanive.
Gjithsesi, ky propozim është për fazën emergjente, teksa Rukiqi ka theksuar se do të insistohet edhe në mjete shtesë në faza tjera.
“Ministri i Financave sapo propozoj: 41 milione euro per paga; 12 milione euro per qirate (per 2 muaj); 20 milione per likuiditet te kompanive. Kjo për fazën emergjente. Mire per fillim, por do te insistojme qe ne faza tjera te alokohen edhe mjete shtese”, ka shkruar ai
