Prokuroria Themelore në Prishtinë ka demantuar se një GPS i gjetur në veturën e gazetarit Vehbi kajtazi është e AKI-së. Reagimi i Prokurorisë vjen pas një postimi të gazetarit Lirim Mehmetaj që tha se Prokuroria e ka konfirmuar këtë informatë.
Në një komunikatë për media, Prokuroria thotë se deklarimet e tilla nuk janë në interes të askujt e “aq më pak të drejtësisë”.
“Prokuroria Themelore në Prishtinë me qëllim të sqarimit të opinionit publik, njofton se i demanton deklarimet e gazetarit Lirim Mehmetaj se prokuroria ka konfirmuar ndonjë lajm sa i përket vendosjes së pajisjeve të GPS në veturën e gazetarit V.K., deklarimet e tilla nuk janë në interes të askujt, e aq më pak të drejtësisë. Për çdo komunikim dhe lajm nga prokuroria do të njoftohet publiku, sikurse ka ndodhur edhe në të kaluarën, pra përmes kanaleve zyrtare”.
Prokuroria shtoi se Prokurori i shtetit do të vazhdojë “në luftimin e veprave penale dhe kryerësve të tyre dhe për këtë opinioni publik do të mbahet i informuar, deklarimet e tilla mund të dëmtojnë integritetin e hetimeve dhe nuk i shërbejnë zbardhjes dhe hetimit të veprave penale”.
Gazetari Lirim Mehmetaj sot ka deklaruar se pajisja përgjuese që i është gjetur gazetarit Vehbi Kajtazi në veturë, është e AKI-së. Sipas Mehmetajt, se kjo pajisje i takon AKI-së tashmë e ka konfirmuar edhe Prokuroria e Shtetit.
