Një rast i rëndë vjedhjeje është shënuar mbrëmjen e 28 majit në fshatin Grazhdanik të komunës së Prizrenit, ku një familje ka mbetur pa stolitë e arit me vlerë të konsiderueshme.
Burime të Telegrami Sot bëjnë të ditur se persona të panjohur kanë hyrë me forcë në një shtëpi private dhe kanë vjedhur stoli ari, të cilat, sipas pronarit, kapin vlerën mbi 10 mijë euro.
Rasti ka ndodhur në orët e mbrëmjes, mes orës 20:00 dhe 23:00, në rrugën “Besim Shala”. Banori i shtëpisë, nga familja Thaçi, ka deklaruar se në momentin e vjedhjes nuk ka qenë askush në shtëpi, ndërsa hajnat kanë depërtuar përmes thyerjes së hyrjes kryesore.
Pavarësisht dëmit të madh material dhe shqetësimit të banorëve, Policia e Kosovës ende nuk ka dalë me një njoftim zyrtar lidhur me hetimet për këtë rast.
Telegrami Sot do të vazhdojë ta ndjekë nga afër zhvillimin e mëtejshëm të këtij rasti.
