Gazetari kosovar, Enver Robelli, që shkruan për gazetën zvicerane “Tagges Anzeiger”, ditë më parë ka publikuar një analizë për rezultatin e zgjedhjeve në Kosovë, raporton Express.
Robelli ka thënë se rezultati që ka dalë nga zgjedhjet e 9 shkurtit ka qenë një shuplakë e vogël e popullit të Kosovës në fytyrën e kryeministrit të Kosovës, Albin Kurti.
“Partia e majtë liberale ka fituar zgjedhjet në Kosovë, por ka humbur shumicën e saj absolute. Nëse kryeministri dëshiron të krijojë qeverinë e re, ai duhet ta bëjë këtë pa ministra inkompetent. Ndërkohë që konflikti I ngrirë me veriun vazhdon”, ka shkruar Robelli.
Tutje Robelli shkruan se rezultati prej 40 % tregon që kosovarët vazhdojnë t’i besojnë në masë të madhe Kurtit dhe LVV-së, ndonëse bazuar në rezultatet preliminare, Kurti ka humbur shumicën absolute në Kuvend. Sipas tij, euforia e para 4 viteve kur Kurti fitoi pak mbi 50 % është zhdukur.
“Euforia që ishte e gjithëpranishme katër vite më parë kur Kurti fitoi zgjedhjet për herë të parë është zhdukur. Tashmë votuesit i kanë dhënë një shuplakë të vogël Kurtit. Për të formuar një kabinet, ai ka shumë të ngjarë të ketë nevojë për një partner koalicioni”, ka shkruar Robelli.
