Ndaj Osmanit madje kishin ardhur reagime fort të ashpra nga administrata e Trumpit kur ajo kishte kundërshtuar elementet e marrëveshjes së Uashingtonit, konkretisht pikën për Ujmanin dhe mos-arritjen e njohjes reciproke, shkruan TelegramiSot.
Ish-emisari special i Trumpit për dialogun, Richard Grenell madje e quante Vjosa Osmanin politikane që di vetëm të ankohet.
“Marrëveshja ishte për njohje ekonomike. Është një hap gjigant. Për ty që ankohesh që nuk more më shumë, ju nuk më dhatë asnjë ide mua. Na duhen politikanë që bëjnë më shumë se sa që ankohen. Kjo është për hapjen e vendeve të reja të punës, jo simbolikë”, kishte shkruar Grenell teksa i ishte kundërpërgjigjur Vjosa Osmanit.
Grenell vazhdonte edhe më tutje sulmin ndaj Vjosa Osmanit, teksa thoshte se simbolika që ajo përdor nuk u ndihmon financiarisht njerëzve për të tejkaluar problemet ditore.
“Ju nuk mund të paguani qiranë tuaj ose të ushqeni familjen tuaj me simbolikë. Studimi i fizibilitetit për liqenin është të dihet saktësisht se si mund të përdoret, çfarë lloj punësh mund të krijohen. Të sugjerosh që emri hap diskutime të tjera është politikë pa kuptim. Ky është një studim për krijimin e vendeve të punës”, ka shkruar Grenell duke i replikuar ashpër vjosa Osmanit.
Osmani para se të largohej nga Lidhja Demokratike e Kosovës, konkretisht gjatë periudhës para dhe pak pas zgjedhjeve të 6 tetorit të vitit 2019, kishte raporte krejt tjera me Richard Grenell.
Ajo madje brenda një periudhe të shkurtër kohore ishte takuar dy herë me emisarin amerikan, njëherë në Prishtinë e njëherë në Berlin.
Sidoqoftë, afrimi me Albin Kurtin do t’i kushtonte asaj me kritika të ashpra nga amerikanët, pasi që ajo u bë zë kundërshtues për marrëveshjen e arritur më 4 shtator në Uashington mes Kosovës dhe Serbisë.
