Forcat e rendit në Rumani i kanë lëshuar rreth 200 mijë gjoba për shkeljen e rregullave të izolimit gjatë pandemisë. Këto dënime janë shqiptuar vetëm nga data 24 mars deri më 19 prill.
Nuk ka të dhëna publike se sa prej këtyre gjobave janë paguar deri më tani. Sidoqoftë, numri i dënimeve në këtë shtet është shumë më i lartë në krahasim me Britaninë, ku policia për tri javë i ka shqiptuar vetëm 3,493 gjoba dhe i ka hapur 83 raste.
Vetën në natën e Pashkëve, në Rumani janë shqiptuar 3,384 gjoba dhe janë hapur 234 raste. Presidenti rumun, Klaus Iohannis, e shpalli gjendjen emergjente në këtë vend më 16 mars për shkak të pandemisë së koronavirusit.
Pas këtij vendimi, qeveria lëshoi disa urdhra ushtarakë për kufizimin e lëvizjes së qytetarëve me qëllim të parandalimit të përhapjes së koronavirusit.
Personat që i shkelin masat kufizuese mund të dënohen me gjoba prej 412 deri në 4,120 euro, shkruan “Romania Insider”.
