Ministrja e Ekonomisë, Rozeta Hajdari, e ka pranuar se disa nga të emëruarit në bordet e përkohshme të tri ndërmarrjeve publike në vend, por është përpjekur të arsyetohet me një fjali të përdorur shpesh nga Haki Abazi, zëvendëskryeministri i Qeverisë së Kosovës.
Në tentim për të arsyetuar emërimin e anëtarëve të Lëvizjes Vetëvendosje në bordet e Postës së Kosovës, ndërmarrjes publike “Infrakos” dhe KRU “Prishtina”, ministrja Hajdari ka deklaruar se emërimet janë të përkohshme me qëllim “ndaljen e gjakderdhjes financiare”.
“Këto janë borde të përkohshme dhe emergjente të pranverës. I kemi për ta ndalur gjakderdhjen financiare dhe rënien e lirë të ndërmarrjeve jetike për qytetarët”, ka thënë Hajdari.
“Ndalimi i gjakderdhjes financiare” është fjali e dëgjuar jo pak herë gjatë javëve të fundit.
Zëvendëskryeministri Haki Abazi e ka përdorur termin “gjakderdhje financiare” në mënyrë që të shpjegojë disa nga vendimet e fundit të qeverisë.
Ai e kishte përdorur të njëjtën fjali kur njoftoi për anulimin e vendimit të qeverisë së kaluar që parashihte kalimin e 50 milionë eurove për kompaninë “Bechtel Enka”.
Edhe kryeministri Kurti e kishte përdorur të togfjalëshin “gjakderdhje financiare” me rastin e vendimit për uljen e pagave të kabinetit qeveritar.
Qeveria në detyrë e Kosovës, të enjten ka shkarkuar bordet e tri ndërmarrjeve publike: Postës së Kosovës, “Infrakos”-it dhe Ujësjellësit “Prishtina”.
Menjëherë pas shkarkimit, Albin Kurti ka emëruar bordet e përkohshme të këtyre ndërmarrjeve.
Ky emërim është bërë fare pa konkurs dhe fare pa konsulta me kompaninë britanike që ishte caktuar për të mbikëqyrur procesin e të përzgjedhurve. Dy prej të emëruarve: Artan Dermaku dhe Mentor Hyseni, janë anëtarë të Lëvizjes Vetëvendosje.
