Në presidencën e Bosnjës, sipas mediave boshnjake, të martën është shpërfaqur një dramë e vërtetë. Anëtari serb i presidencës boshnjake, Milorad Dodik e ka paraqitur kërkesën për mbajtjen e një takimi të jashtëzakonshëm, për zhvendosjen e ambasadës boshnjake nga Tel Avivi për në Jerusalem.
E anëtari kroat i presidencës, Zhelko Komshiq, ka kërkuar seancë të jashtëzakonshme me propozimin që Bosnja ta njohë Kosovën.
Kishte qenë Dodiku ai që e kishte dërguar i pari kërkesën për mbajtjen e një seance të jashtëzakonshme, raporton portali Klix.ba. Kërkesa e tij kishte vetëm një pikë: “Propozim vendim për ndërrimin e selisë së ambasadës së Bosnjës në shtetin e Izraelit”.
Kjo kërkesë kishte ardhur pasi që dy anëtarët tjerë të presidencës së Bosnjës, Shefik Xhaferoviq dhe Zhelko Komshiq, kishin vlerësuar publikisht se propozimi i Dodikut rreth zhvendosjes së ambasadës nga Tel Avivi është kërkesë populiste dhe joreale.
Sipas dokumenteve të siguruara nga portali Klix.ba, është kërkuar që seanca të mbahet të mërkurën në orën 11.
Është interesante megjithatë që ndërkohë është paraqitur edhe kërkesa për mbajtjen e një takimi tjetër të jashtëzakonshëm të presidencës së Bosnjës, në orën 10:45, vetëm 15 minuta para takimit të kërkuar nga Milorad Dodik.
Në të vërtetë, fjala është kërkesën e kabinetit të anëtarit të presidencës boshnjake, Zhelko Komshiq. Nga kabineti i Komshiqit është kërkuar që në atë takim të jashtëzakonshëm të diskutohet rreth “Propozim-vendimit për njohjen e Republikës së Kosovës”.
