Jetë të shumta u shuan gjatë vitit të kaluar dhe muajt e parë të këtij viti si pasojë e aksidenteve në trafik.
Si pasojë e përplasjeve të shumta në trafik, shqetësuese është numri i madh i aksidenteve anembanë vendit.
Por për të parandaluar rritjen edhe më të madhe të rrezikut nga aksidentet, nga Policia e Kosovës vazhdimisht janë shqiptuar gjoba për shkelësit e rregullave në trafik.
Madje gjatë muajve të fundit në kuadër të Policisë së Kosovës pati shtim të numrit të zyrtarëve policorë të cilët merren me situatat e krijuara në rrugët e vendit.
Por në një përgjigje të dhënë për lajmi.net nga Policia e Kosovës kanë deklaruar se gjatë periudhës kohore janar-maj 2021 janë shqiptuar gjithsej 167.304 tiketa në trafik.
Ndërsa përgjatë kësaj kohe pati në total 7 mijë e 645 aksidente.
Si pasojë e këtyre aksidenteve humbën jetën 42 persona, duke mos llogaritur këtu edhe aksidentet e muajit qershor.
“Veç aktiviteteve policore në këtë aspekt, Policia e Kosovës në vazhdimësi apelon te të gjithë pjesëmarrësit në trafik që të respektojnë rregullat dhe shenjat e trafikut rrugor si dhe t’iu përshtaten kushteve të rrugës dhe atyre atmosferike.Policia e Kosovës, për të gjithë ata pjesëmarrës në trafik, e në veçanti për drejtuesit e automjeteve të cilët bëjnë shkelje të ligjeve e rregullave të trafikut, nuk do të bëjë asnjë tolerim, do të ndërmerr masa ndëshkuese sipas ligjeve në fuqi”, u tha nga Zyra për Informim e Policisë së Kosovës.
Gjithashtu është theksuar se Policia e Kosovës do të vazhdoj të rris prezencën policore në trafik si dhe pjesëmarrjen e masave ndëshkuese ndaj të gjithë kundërvajtësve.
Përpos kësaj, në 24 orëshin e fundit Policia e Kosovës ka shqiptuar 1 mijë e 673 tiketa për të gjithë shkelësit e rregullave.
Në të njëjtën kohë u shkaktuan 73 aksidente, ku 27 prej tyre ishin me të lënduar.
