Së paku për një muaj personat e arrestuar për fajde në Pejë do t’i kalojnë në çeli. Masa e paraburgimit iu shqiptua që të 16-ve të mërkurën mbrëma.
Nga 5 milion euro sa është vlera e fajdeve që deri tashti Prokuroria ka zbuluar, gjysmë milioni iu morën apo i mbetën ende borxh vetëm një personi. Klani ka siguruar dosjen e kësaj viktime, emri i të cilit nuk do të bëhet publik.
I njëjti nga viti 2017 deri në vitin 2021 kaloi nëpër duart e 20 të dyshuarve për fajde.
Nga këta persona viktima nga Peja dyshohet se ndër vite ka marrë hua rreth 183 mijë euro, në formë të hollash apo përmes veturave, dhe i është dashur t’i kthejë borxh me kamatë të shtuar mbi 600 mijë euro. Shumicën e mjeteve nuk ka arritur ta paguajë.
Grupi nisi të merrej me të dëmtuarin në 2017ën përmes një fqinji të tij, V.K. Ky me të dëgjuar nga prindi i tij i cili dikur kishte qenë i burgosur se, tani viktima, ka rreth 20 mijë euro të kursyera, shkon dhe ia kërkon ato në emër të vëllait të M.Z, i cili ishte vrarë. Pasi nën detyrim i jep kursimet e tij pëson humbje në biznes dhe nis maratona e fajdeve.
Në disa raste kjo viktimë është keqtrajtuar nga ata që u kërkoi borxh. Ndër ta edhe K.K-së nga i cili bleu një Audi A6 në 2020 për 12 mijë euro.
“Fillimisht i pandehuri i vendosë kamatën prej 10% duke e detyruar çdo muaj t’ia paguajë nga 1.200 euro, të cilën shumë ia paguan për 6 muaj, gjithsej 7.200 euro dhe kur nuk arrin ta paguajë tutje këtë shumë i pandehuri K.K ia rritë kamatën dhe borxhin në total 28.000 euro. Por kur i dëmtuari përveç shumës prej 3.000 euro të cilat ia jep në periudha të ndryshme e në shuma të vogla dhe në një situatë kur i dëmtuari kishte për t’ia dërguar shumën prej 1.200 euro e të cilat nuk i kishte, por vetëm 200 euro, i pandehuri e sulmon dhe godet duke ia thyer krahun e majtë.” – Dosja e Prokurorisë (ngjarje e vitit 2020, i dyshuar K.K)
Pati raste edhe më të rënda, krahas kërcënimeve të vazhdueshme.
“….Ai së bashku me një person me emrin Lili nga Istogu, pasi e hasin në afërsi të Burgut në Pejë, me forcë e nxjerrin nga vetura e tij dhe e fusin në një veturë të tipit “Audi Q7” dhe e dërgon tek shtëpia e tij, e fusin në bodrum ku për 4-5 orë e maltretojnë fizikisht e psiqikisht duke kërkuar nga gruaja e tij V. t’i sjellë 42.000 euro. – Dosja e Prokurorisë (ngjarje e vitit 2021, i dyshuar I.C)
Kjo viktimë morri fajde 500 euro edhe nga një polic, në emër të dikujt tjetër.
