Nënkryetari i Partisë Demokratike të Kosovës, Uran Ismaili ka komentuar takimin mes Albin Kurtit e Isa Mustafës. Duke pyetur se si ndihen votuesit e VV-së të cilët Albin Kurti i tradhton duke iu lutur Isa Mustafës për partneritet.
“Mbështetësit e tij janë tronditur nga fakti se ai e paska quajtur Isa Mystafën “profesor” dhe i paska uruar punë të mbarë dhe shëndet. Sa qesharake dhe sa ironike”, ka shkruar nënkryetari i PDK-së.
Ismaili përmes një shkrimi në Facebook e ka cilësuar si qesharak dhe ironik këtë takim. Sipas tij Albin Kurti e shet veten si të dinjitetshëm e me integritet, por nga frika që të shkojë i vetëm në zgjedhje ai po i përulet “Profesorit” deri në servilosje.
Sipas Ismailit për Kurti një kohë Isa Mustafa nuk ishte “profesor”, por shërbëtor i Rrahman Morinës, Aleksandër Vuçiqit dhe Ivica Daçiqit. Ishte “argat i Serbisë që po e bosnjëzon Kosovën dhe Esat Pashë që po i falë territore Malit të Zi”.
“Dikur e akuzonte me 72 dosje për krim të organizuar, sot e lajkaton me ofertë për koalicion.Ai tani po e sheh si shpresë njeriun që e akuzonte se “po e zbrazë Kosovën duke e mbytur perspektivën”. Në ditët e tij të arta të huliganizmit nuk i uronte Isa Mustafës punë të mbarë, por rrëzim të mbrapshtë e të dhunshëm. Nuk i uronte shëndet e jetë të gjatë, por qeverisje të shkurtër dhe fund të mjerë duke ia rrezikuar shëndetin me gaz lotsjellës”, ka shkruar ai.
Mes kritikave nënkryetari i PDK-së është shprehur se kreu i VV-së për të prekur pushtetin është në gjendje të shndërrohet edhe në vegël të personit që e luftonte me metodat më të pamoralshme dhe më jodemokratike dhe me të cilin nuk e lidhë asnjë princip apo vlerë përpos frika nga PDK-ja dhe lakmia për privilegje.
Por pavarëisht këtyre tendencave Ismaili ka thënë se këto aleanca tepër joparimore vetëm se do ta rrisin mbështetjen qytetare për PDK-në.
“Rrugëtimi ynë drejt rikonfirmimit si forca më e madhe demokratike në vend është i pakthyeshëm. Ne mbesim rruga e vetme për luftimin e korrupsionit, nepotizmit dhe ndërtimit të një shteti që ofron ardhmëri të sigurt për të gjithë qytetarët e tij”, ka deklaruar ai përmes Facebook—ut.
Gjatë ditës së sotshme Albin Kurti e Isa Mustafa janë parë në njërin prej restoranteve të kryeqytetit. Mediat nuk janë lejuar, por pas takimit të dy kryetarët e partive janë deklaruar përmes llogarive të tyre në Facebook. Të kanë deklaruar se janë në pajtim të plot për shpërbërjen e Kuvendit më 22 gusht dhe të gatshëm për zgjedhjet e reja./Insajderi.com
Albin Kurti shpalos detaje nga takimi me Isa Mustafën
