Kryeshefi Ekzekutiv i Termokos, Fisnik Osmani, ka nisur javën me një takim të rëndësishëm me përfaqësues të partnerëve strategjikë ndërkombëtarë: z. Moritz Remé, Drejtor i KfW – Kosovë, dhe z. Sergiy Maslichenko, Drejtor i EBRD – Kosovë.
Ky takim shënon një moment kyç për konsolidimin e bashkëpunimit me dy nga institucionet më të rëndësishme financiare dhe zhvillimore në Evropë, të cilat janë të përkushtuara të mbështesin projektet e tranzicionit të gjelbër në sektorin e energjisë termike për kryeqytetin.
“Mbështetja që po merr Termokos nga partnerët tanë strategjikë është një tregues i qartë se jemi në rrugën e duhur për të përmbushur objektivat tona”, deklaroi Osmani.
Pikat kyçe të bashkëpunimit:
Rritja e efikasitetit energjetik në rrjetin e ngrohjes së Prishtinës
Investime të reja në teknologji të pastër dhe burime alternative termike
Mbështetje për projektet kapitale në përputhje me tranzicionin klimatik të BE-së
Osmani theksoi se menaxhmenti i Termokos është duke punuar me strategji afatgjate, përkushtim dhe transparencë, për të garantuar që çdo projekt të zbatohet sipas standardeve më të larta.
“Jemi të përkushtuar të garantojmë standarde të larta dhe transparencë të plotë në implementimin e projekteve tona strategjike”, theksoi Osmani.
Kjo lëvizje e re e Termokos vjen në kuadër të vizionit për Prishtinën e Gjelbër, duke e vendosur qytetin në rrugën drejt një të ardhmeje më të qëndrueshme energjetikisht.
