Kryetarja e Kuvendit të Kosovës, Vjosa Osmani gjatë vizitës së saj në Obiliq nuk ka dashur ta komentojë shkarkimin e saj nga pozita e nënkryetares së Lidhjes Demokratike të Kosovës, shkruan Reporteri.net
“Unë jam përgjigjur pardje me shkrim. Në mënyrë që mos ta humbasim fokusin nga tema e shëndetit nuk kam asgjë për të shtuar. Nuk kam asgjë për të shkuar nga ajo që e kam thënë vetëm e rikonfirmojë të gjithë atë që e kam thënë të shtunën”, ka thënë Osmani.
Ajo të shtunën pas shkarkimit ka ka dhënë disa arsye pse u shkarkua nga këto dy pozita, ndërsa ka falënderuar 53 anëtarët e Këshillit Drejtues që votuan kundër shkarkimit të sajë. Osmani ka paralajmëruar se shumë shpejt do të mbahen edhe zgjedhjet e brendshme partiake, ku u ka bërë me dije se do të jetë kandidate për kryetare të LDK-së..
Osmani tha të shtunën se është përjashtuar dhe diferencuar sepse ka thënë që nuk do të bashkëpunojë me të korruptuarit dhe e ka dashur ndryshimin në Kosovë. Ajo ka deklaruar se është shkarkuar vetëm se është grua.
Po përjashtohem e diferencohem sepse:
Thashë kurrë me të korruptuarit, dhe ashtu mbeti;
Thashë do t’i sjellim Kosovës ndryshimin e jo mendësinë e vjetër në pushtet, dhe ashtu mbeti;
Thashë se nuk do ta përkrahë asnjë tregtar të kufijve e të sovranitetit, dhe ashtu mbeti.
Thashë për Kosovën do të kërkojmë barazi nëpërmjet reciprocitetit, dhe ashtu mbeti;
Thashë se askujt nuk do t’i punojmë pas shpine, dhe ashtu mbeti;
Pra, u diferencova e shkarkova sepse e mbajta fjalën.
U diferencova edhe për shkak se jam grua, sepse asnjë nënkryetar burrë në të kaluarën, edhe kur kanë kundershtuar e vepruar kundër vendimeve të partisë, nuk janë përjashtuar.
Por, të dashur qytetarë të Kosovës, sistemet që themelin mbi të cilin qëndrojnë e kanë diferencimin, janë gjithnjë të destinuara të dështojnë. Kështu ka qenë në të kaluarën, e kështu do të jetë edhe tash e tutje, të jeni të bindur. Prandaj po e përsëris atë që e kam thënë në Kuvend më 25 mars:
Në politikë, sikur edhe në jetë, ndonjëherë duhet ta paguash çmimin e të qenit parimor. Unë e kam provuar në lëkurën time më shumë se njëherë. Por, parimësia tregon udhën e vërtetë, edhe kur ajo është e mbushur përplot gjemba. E, unë nuk përtoj t’u rrekem këtyre pengesave për ta bërë të dukshme dritën, edhe nëse kjo nuk kuptohet nga disa mendjeshkurtër që sot votuan për përjashtimin e diferencimin tim. Por është një udhë që unë e kam ndjekur këto 20 vjet e ajo është udha që ta shtron besimi qytetarë dhe asaj nuk e kam ndërmend t’i ndahem kurrë. Në secilën betejë, do të jem me qytetarët, deri në fund.
I falenderoj 53 anëtarët e Këshillit të Përgjithshëm që nuk u bënë pjesë e këtij diferencimi politik. Ndërsa për diferencuesit e sotëm, shihemi në garën zgjedhore së shpejti. E aty do ta shohim se kush do të fitojë kur të dalim para qytetarëve. Gara e vërtetë është para qytetarëve, edhe pse shumica dërmuese prej jush diferencues, jeni aq frikacakë sa nuk do të guxoni të dilni në atë përballje, por sërish do të fshiheni prapa dikujt tjetër. Por përballja e madhe do të ndodhë. Mua më ka ngritur populli dhe vetëm ai do të mund të më rrëzojë.
