Banorët e fshatit Vragoli dhe Miradi të komunës së Fushë Kosovës akuzojnë biznesin “Nora Center” për vërshimet e fundit atje dhe kësisoj kërkojnë kompensim të dëmeve të tyre
Vërshimet si pasojë e reshjeve javëve të fundit në Kosovë, kanë sjellë pasoja të mëdha pothuajse në secilin rajon.
Ndër komunat më të prekura është Fushë Kosova me fshatrat përreth.
Banorët e fshatrave Vragoli dhe Miradi, thonë se vërshimet u kanë shkaktuar atyre dëme të mëdha, duke filluar nga ato materiale e deri në dëmet e qarkullimit të ekonomisë nëpër biznese përreth.
Duke dashur që t’i identifikojnë problemet e këtyre vërshimeve, banorët atje pohojnë se problemi qëndron te ngushtimi i shtratit të rrjedhës së lumit Sitnica nga lokali i biznesit që ndodhet aty, i njohur si “Nora Center”.
Sipas banorëve, gjatë punimeve të objektit “Nora Center”, dheu është hedhur në lumë (mbi 1000 kamionë dhe), duke shkaktuar kështu problem në rrjedhjen e natyrshme të lumit.
Banorët e fshatit, i janë drejtuar komunës së tyre me një peticion që të ndërmarrin veprime urgjente ndaj “Nora Center”, në mënyrë që t’i kompensojë dëmet materiale nëpër pronat e tyre private dhe gjithashtu kërkojnë intervenime urgjente për largime të dheut.
Në peticionin e siguruar nga portali Ballkani.info., shihet që banorët i kanë dhënë afat komunës dy deri pesë ditë që t’i realizojnë kërkesat e tyre, në të kundërtën paralajmërojnë protesta.
Më poshtë gjeni peticionin e tyre dhe pamje nga vendi ku është hedhur dheu, që pengon rrjedhën e lumit duke shkaktuar edhe vërshime.
