Kryeministri Avdullah Hoti ka thënë sot se lajmi për mos fillimin e mësimit deri më 14 shtator nuk i ka gëzuar as fëmijët e as prindërit.
“Nuk ka qenë e lehtë të marrim një vendim të tillë. Por, shëndeti i juaj dhe i prindërve e gjyshërve tuaj na detyron të jemi të kujdesshëm. Na duhet disiplinë e përgjegjësi individuale e kolektive për të tejkaluar së bashku këtë situatë. Kjo sfidë, që tashmë është shndërruar në betejë, nuk mund të fitohet vetëm nga mjekët dhe nga institucionet. Duhet të rreshtohemi bashkë, njëri krah tjetrit, për t`i bërë ballë virusit tash kur po ofrohet vjeshta. 14 shtatori është afër. Shumë kush do të thotë se për këto dy javë nuk do të fitojmë asgjë, por gabohen. Kur të gjithë së bashku pranojmë të vihemi në shërbim të shëndetit të fëmijëve tanë, mund t`i bëjmë lak së keqes duke e evituar atë”, ka thënë sot Hoti.
Mirëpo, kjo nuk i ka pëlqyer një zyrtari të lartë të Komunës që udhëhiqet nga Lufti Haziri, njëherit nënkryetarit të LDK-së, shkruan Ballkani.info.
Zyrtari i lartë për integrime në Komunën e Gjlanit, Burim Elezi ka shkruar në postimin e Hotit për shtyrjen e mësimit se ky nuk ka qenë vendim i tij. “Kryeministër, vendimi s’ka qenë i juaji. Vendimi ka qenë i SBASHK-ut”, ka shkruar Elezi.
Tutje ai e ka pasur një porosi për bashëpartiakun e tij, kryeministrin Hoti. “Veç nëse vazhdon me e mbajt tupanin Ti, e me ta rreh dikush tjetër jep dorëheqje. Shtyrja e mësimit është vendimi më i gabuar që ju e keni mbështetë”, ka shkruar “njeriu i Lutfi Hazirit”.
