Banorët e pesë shteteve evropiane, që nuk bëjnë pjesë në listën e shteteve me rrezik të lartë të infektimit mund të hyjnë në Kosovë pa test PCR-Negativ dhe nuk kanë nevojë të vetë-izolohen.
Në bazë të listës së publikuar në web faqen e Qendrës Evropiane për Parandalimin dhe Kontrollin e Sëmundjeve, shtetet e vetme që nuk kanë rrezik të lartë të infektimit janë: Danimarka, Finlanda, Norvegjia, Greqia dhe Islanda.
Kurse shtetet me rrezik të lartë të infektimit janë: Franca, Spanja, Italia, Gjermania, Polonia, Çekia, Holanda, Portugalia, Rumania, Belgjika, Suedia, Austria, Hungaria, Sllovakia, Kroacia, Bullgaria, Irlanda, Lituania, Sllovenia, Latvia, Luksemburgu, Estonia, Qiproja, Malta dhe Lihtenshtajni.
Qeveria në detyrë e Kosovës dje ka miratuar masat e reja për parandalimin e përhapjes së COVID-19.
Njëra nga masat që është miratuar sërish është edhe posedimi i testit PCR-Negativ jo më i vjetër se 72 orë për personat që vijnë në Kosovë nga shtetet me rrezik të lartë të infektimit, masë kjo që aplikohet prej tetorit të vitit të kaluar.
“Qytetarët e huaj që hyjnë në Kosovë, përfshirë edhe ata me leje qëndrim të përkohshëm ose përhershëm në Kosovë, që vijnë nga vendet me risk të lartë sipas listës zyrtare të ECDC-së, duhet të kenë test RT-PCR negativ për Covid-19 të bërë në 72 orët e fundit, në bazë të parimit të reciprocitetit”, thuhet në vendimin e Qeverisë.
