Lionel Messi ka qenë protagonist përsëri tek Inter Miami.
Ylli argjentinas i realizoi dy gola në fitoren me rezultat 3:2 ndaj Columbus Crew.
Me këtë rast, 37 vjeçari e ndihmoi ekipin amerikan që ta fitojë për herë të parë trofeun “MLS Suporters’ Shield”.
Tetë herë fituesi i Topit të Artë e hapi serinë e golave në fund të pjesës së parë, ndërsa e ngriti epërsinë pas pak minutash me një goditje brilante nga gjuajtja e lirë.
Crew e ngushtuan rezultatin me Diego Rossin në ndeshjen e zhvilluar në Ohio, shkruan “BBC”, përcjell “Gazeta Express”.
Mirëpo, ish-futbollisti i Liverpoolit dhe Barcelonës, Luis Suarez e riktheu epërsinë dygolëshe te Inter Miamit.
Ajo çka mundi ta bënte Columbus ishte ta ngushtonte rezultatin në 2:3 përmes Cucho Hernandez, që shënoi nga penalltia.
Sidoqoftë, Inter Miami fitoi në fund dhe ky ekip e mbylli sezonin në krye të tabelës duke e fituar trofeun “Supporters Shield”.
Ky trofe i ndahet ekipit që i ka statistikat më të mira në sezonin e rregullt në MLS, ndërsa për herë të parë ka nisur të ndahet në vitin 2020.
Ky ishte trofeu i 46-të në karrierë për Lionel Messin, përfshirë këtu klubet dhe Kombëtaren.
Duke përfunduar në krye të tabelës, Miami e siguroi avantazhin e të luajturit në shtëpi gjatë “play-offit” pas-sezonal.
“Objektivi i parë është arritur dhe tash duhet të mendojmë se çka na pret në vazhdim”, deklaroi Messi pas ndeshjes.
“Rundi i parë është me tri ndeshje, por më pas është me një ndeshje dhe gjithçka mund të ndodhë. Sidoqoftë, ne e kemi një avantazh të madh pasi do t’i luajmë ndeshjet në shtëpi, e cila ishte ajo që po e kërkonim. Ne jemi mjaft të fortë në shtëpi”, vazhdoi kampioni i botës.
Miami i shënoi dy fitore në dy ndeshjet e fundit në ligë duke e mposhtur rekordin e deritashëm të MLS-së për më së shumti pikë të grumbulluara brenda sezonit të rregullt.
