Në profilin zyrtar në ‘Facebook të presidentit të Francës ‘, Emmanuel Macron, është shfaqur një njoftim në gjuhën shqipe përmes të cilit tregohej se së shpejti drejt Shqipërisë do të nisen një skuadër e forcave speciale të zjarrfikësve nga Franca , të cilët do të marrin pjesë në operacionet e shpëtimit pas serisë së tërmeteve që kanë goditur sot Shqipërinë që nga orët e para të mëngjesit, shkruan Gazeta Express.
Në këtë njoftim ndër të tjera është thënë se Franca në këto momente solidarizohet me Shqipërinë duke shprehur ngushëllime me familjet e viktimave dhe të lënduarit.
Ky njoftim është shfaqur dhe ka qëndruar në faqen e ‘Facebook’ të Macron, ndërkohë më pas është fshirë. Gazeta Express ka një ‘screen shot’ të reagimit.
Lidhur me tragjedinë e sotme në Shqipëri kanë reaguar liderë të ndryshëm shtetesh, të cilët kanë dërguar forca të specializuara drejt Durrësit për të ndihmuar autoritetet shqiptare për shpëtimin e atyre që kanë mbetur nën gërmadha.
Kjo nuk është hera e parë që Macron shkruan diçka në gjuhën shqipe. Më 20 korrik të këtij viti, videon e një fjalimi në Beograd e kishte shoqëruar me një përshkrim në shqip.
