Ministri i Infrastrukturës dhe Ambientit, Lumir Abdixhiku, ka kërkuar anulimin e përkohshëm të të gjitha fluturimeve që vinë nga Italia e Veriut, për shkak të koronavirusit
Këtë ai e ka bërë të ditur përmes një statusi në Facebook, ku shkruan se Instituti Kombëtar i Shëndetësisë ka rekomanduar ndalimin e këtyre fluturimeve.
“Sot, në ora 12:40 kemi pranuar rekomandim emergjent nga Instituti Kombëtar i Shëndetësisë për anulimin e të gjitha fluturimeve që vijnë nga zonat epidemike të Italisë së Veriut – si reflekcion i karantinës së vendosur nga qeveria italiane në betejën kundër Coronavirusit. Si rrjedhojë, kam kërkuar anulimin e përkohshëm të të gjitha fluturimeve që vijnë nga kjo zonë epidemike e cilësuar si zonë me risk tē lartë. Fluturimet janë ndërprerë”, ka shkruar Abdixhiku.
Abdixhiku ka shtuar se është në kontakt me Ministrin e Shëndetësisë, Arben Vitia, dhe atë të Punëve të Jashtme, Glauk Konjufca, për të koordinuar kontrollin në Aeroportin “Adem Jashari”.
“Ndjejmë keqardhje për masat e marra – por në situatën e tanishme nuk kemi alternativë. Jam në kontakt të ngushtë me Ministrin e Shëndetësisë Vitia dhe me Ministrin e Punëve të Jashtme Konjufca për të koordinuar kontrollin ne Aeroport dhe asistencën eventuale ndaj udhëtarëve në zonat e rrezikshmërisë së lartë”, ka shkruar Abdixhiku.
Si është gjendja në Itali?
Kryeministri i Italisë, Giuseppe Conte, ka thënë se së paku 16 milionë banorë janë vendosur në karantinë në rajonin e Lombardisë dhe në 14 provinca të tjera deri në fillim të prillit.
Masat e ashpra të izolimit do të bëjnë që në pjesën veriore të shtetit të mbyllen palestrat, pishinat, muzetë dhe qendrat e skijimit. Të ndaluara do të jenë edhe tubimet me rastin e martesave apo varrimeve.
Italia është vendi më i goditur evropian nga koronavirusi dhe vetëm të shtunën i raportoi 49 viktima të reja, shkruan “BBC”, transmeton Gazeta Express.
Masat e reja, të cilat e përfshijnë edhe qendrën financiare, Milanon, dhe vendin e famshëm për turistë, Venecian, do të qëndrojnë në fuqi deri më 3 prill.
Numri i viktimave në Itali ka shkuar në mbi 230. Vetëm në 24 orët e kaluara, autoritetet raportuan për 50 persona të vdekur. Ndërkohë numri i të infektuarve u rrit për më shumë se 1200, duke shkuar në 5883.
Askush nuk do të ketë të drejtë të hyjë apo të dalë nga rajoni i Lombardisë, ku banojnë 10 milionë njerëz, përpos rasteve emergjente. Milano është qyteti më i madh në këtë pjesë.
Në këto masa përfshihen edhe rajonet e Venecias, parmës dhe Modenës, me ç’rast preken rreth 16 milionë njerëz.
