Në kuadër të përpjekjeve për një Prishtinë më të pastër dhe më të gjelbër, Ndërmarrja Publike “Termokos” ka dorëzuar një kamionetë në shfrytëzim për Ndërmarrjen “Gjelbër”, që do të shërbejë për mirëmbajtjen e hapësirave të gjelbërta në kryeqytet.
Memorandumi i bashkëpunimit është nënshkruar sot nga Kryeshefi Ekzekutiv i Termokosit, z. Fisnik Osmani, dhe Kryeshefja Ekzekutive e NPL “Gjelbër”, znj. Nora Cimili Gagica.
“Bashkëpunimi në mes të ndërmarrjeve publike është jetik për ofrimin e shërbimeve cilësore dhe të qëndrueshme për qytetarët. Dorëzimi i kësaj kamionete është vetëm një hap konkret në drejtim të përmirësimit të kushteve për punonjësit e ‘Gjelbër’-it dhe për qytetin e Prishtinës,” u shpreh z. Osmani.
Ndërmarrja “Gjelbër” është përgjegjëse për ruajtjen dhe mirëmbajtjen e hapësirave të gjelbërta në kryeqytet, ndërsa me këtë mbështetje nga Termokos pritet të rritet efikasiteti dhe shtrirja e punimeve në terren.
Nga ana tjetër, znj. Cimili Gagica falënderoi Termokosin për këtë mbështetje dhe theksoi se iniciativa të tilla e forcojnë bashkëpunimin institucional dhe ndikojnë drejtpërdrejt në cilësinë e jetës së qytetarëve.
Ky veprim vjen si pjesë e vizionit për një Prishtinë të Gjelbër, nismë që është duke marrë gjithnjë e më shumë mbështetje institucionale në vitet e fundit.
