Shqipëria ka shënuar një tjetër hap domethënës drejt anëtarësimit në Bashkimin Europian. Në një konferencë ndërqeveritare të zhvilluar këtë të hënë në orën 18:00 në Bruksel, është hapur zyrtarisht grupkapitulli i dytë i negociatave – “Tregu i Brendshëm”, një nga blloqet më të rëndësishme për përafrimin me legjislacionin europian.
Takimi u drejtua nga Ministri i Jashtëm i Polonisë, Radosław Sikorski, vendi që mban aktualisht Presidencën e radhës të Këshillit të BE-së, dhe pati pjesëmarrjen e kryeministrit Edi Rama si dhe Eurokomisioneres për Zgjerim, Marta Kos.
Pas njoftimit për hapjen e grup kapitullit të dytë, Rama u shpreh falënderues dhe tha se Shqipëria do të vijojë rrugën për t’u futur në BE.
“Anëtarësimi i Shqipërisë në BE është shumë më tepër se një ambicie politike apo ekonomike, por ekzistenciale. E kemi mësuar në mënyrën më të vështirë që barazia jonë para ligjit dhe e ardhmja për fëmijët tanë nuk mund të garantohet askund tjetër se brenda BE. Faleminderit Radosław, e di që ke shumë punë për të bërë e megjithatë keni qenë i dedikuar ndaj kësaj pjese të të gjithë asaj pune të madhe të presidencës suaj dhe keni realizuar diçka që nuk do ta harrojmë. Faleminderit Marta që na besove dhe që na ke shtyrë pa hezitim sepse kjo është e vetmja mënyrë për të ecur para”, tha Rama.
Grupkapitulli i dytë përfshin një sërë fushash kyçe që synojnë përgatitjen e vendit për të funksionuar brenda tregut unik europian. Ai përmbledh këto kapituj:
Kapitulli 1: Lëvizja e lirë e mallrave
Kapitulli 2: Lëvizja e lirë e punëtorëve
Kapitulli 3: E drejta e themelimit dhe liria për të ofruar shërbime
Kapitulli 4: Lëvizja e lirë e kapitalit
Kapitulli 6: Legjislacioni për shoqëritë tregtare
Kapitulli 7: E drejta e pronësisë intelektuale
Kapitulli 8: Politika e konkurrencës
Kapitulli 9: Shërbimet financiare
Kapitulli 28: Mbrojtja e konsumatorit dhe shëndetit
Në fjalën e tij, Rama e cilësoi këtë zhvillim si “një tjetër gur themeli në rrugën europiane të Shqipërisë”, ndërsa Marta Kos theksoi progresin e bërë nga Tirana në reformat ekonomike dhe institucionale, duke nënvizuar rëndësinë e vazhdimësisë dhe zbatimit të tyre në terren.
Me hapjen e grupkapitullit të dytë, Shqipëria ka çelur tre nga gjashtë blloqet e mëdha negociuese:
Kapitujt Themelorë – Të hapur në tetor 2024, gjatë presidencës hungareze
Politika e Jashtme dhe Siguria – Të hapur më 17 dhjetor 2024
Tregu i Brendshëm – Të hapur më 14 prill 2025
Mbeten për t’u hapur edhe grupkapitujt për:
Konkurrueshmërinë dhe rritjen gjithëpërfshirëse
Agjendën e Gjelbër dhe Qëndrueshmërinë
Resurset, Buxhetin dhe Institucionet
Objektivi i shpallur nga qeveria shqiptare mbetet anëtarësimi i plotë në BE deri në vitin 2030.
