Skuadra e Prishtinës sot njoftoi se trajneri i deri tanishëm Bylbyl Sokoli ka dhënë dorëheqje për shkak të një problemi shëndetësor.
Andaj si zëvendësim i tij është vendosur Armend Dallku, ish kapiteni i Prishtinës, shkruan Indeksonline.
Tre vitet e fundit ishte kapiten i skuadrës dhe pjesëmarrës tre herë rresht në UEFA Ligë, fitues i Kupës së Kosovës, fitues i Superkupës së Kosovës dhe dy herë nënkampion i Kosovës.
Po ashtu edhe me Kombëtaren e Shqipërisë ka regjistruar 64 ndeshje dhe hyn në mesin e 15 futbollistëve me më së shumti paraqitje.
Kurse pritja e ish-bashkëlojtarëve ishte e ngrohtë, mesazhi kryesor i klubit u drejtua nga nënkryetari Kurtolli: “Me Armendin shpresojmë dhe besojmë shumë të kemi gjetur zgjidhjen për 3-4 vitet e ardhshme për stolin bardhekaltër”.
Përndryshe, Dallku 36 vjeç, i lindur më 16.06.1983 në Vushtri dhe vendbanim në Prishtinë, është kryetrajneri më i ri i skuadrës, mbase në histori të klubit dhe jo vetëm në 40 vitet e fundit.
