Vrasësi famëkeq që pritet të ekstradohet në Bosnje, kreu krime rrëqethëse
Sinisha Petriç Zenica (38) duhet të ekstradohet në Bosnje dhe Hercegovinë në shkurt, dhe një herë u dënua për një nga vrasjet më monstruoze në këtë rajon, kur dy familje u vranë brutalisht brenda një nate në janar 1994. Vetë Zenica qëlloi gjakftohtësisht djalin, i cili në atë kohë ishte 10 vjeç.
Para se të bashkohej me Luka Bojoviqin dhe anëtarët e klanit Zemun, Petriç ishte anëtar i grupit kriminal të famëkeqit Marinko Magda, i cili likuidoi brutalisht deri në 14 persona gjatë festave të Vitit të Ri në vitin 1994, në veri të Serbisë dhe në jug të Hungarisë.
Në çdo dhomë kishte nga një kufomë, në mesin e të vrarëve brutalisht ishte Dani i vogël (10).
Zenica së shpejti do të kthehet në Ballkan dhe krimet e grupit të tij ngrenë të dridhura edhe sot.
Vetëm brenda një nate u vranë pesë persona, mes tyre një djalë 10-vjeçar. Pastaj Vera dhe Josip Agatiq, si dhe Milan Petriq, së bashku me gruan dhe djalin e tij Danet (10) u likuiduan brutalisht. Vrasja e Petriqit ishte veçanërisht e tmerrshme, raporton Nova
Më pas Magda vrau prindërit e djalit dhe anëtarët e tjerë të grupit kriminal i thanë djalit të fshihej pas krevatit. Kur kontrolluan shtëpinë dhe gjetën paratë, u drejtuan për në dalje.
Siç kanë raportuar më parë mediat, Zenica në atë moment është kthyer dhe ka qëlluar gjakftohtësisht fëmijën, e më pas vrasësit janë larguar nga shtëpia.
Në lidhje me këtë vepër ka filluar gjykimi dhe kur është pyetur për arsyen e vrasjes së fëmijës, Petriq është përgjigjur vetëm shkurt se është nervoz.
Me atë rast ai u dënua me vdekje për vrasje të rëndë, por ky dënim iu ndryshua në 15 vjet burg.
Pasi u arratis dy herë nga burgu, gjurmët e tij humbën deri në arrestimin e tij në Spanjë në vitin 2021. Më pas ai u arrestua në shoqërinë e Luka Bojoviqit, por edhe pjesëtar i “klanit të ri Zemun”.
Me vendim të gjykatës kombëtare në Spanjë, Petriq u dënua me pesë vjet për krim të organizuar dhe për posedim të një arsenali lufte të armëve dhe armëve të zjarrit me 10 vjet burg.
Petriq kërkoi që pjesën e mbetur të dënimit ta vuante në Bosnje dhe është gjithashtu interesant fakti që bashkëpunëtori i tij i ngushtë Bojoviq u ekstradua nga Spanja në Serbi vitin e kaluar.
Bojoviq është një njeri i lirë në Serbi.
Krimineli serb për të cilin dështoi ekstradimi nga Spanja në Bosnjë e Hercegovinë dy herë me radhë, njihet mjaft mirë nga të mbijetuarit e Masakrës së Dubravës.
Sinisha Petriq, i njohur me nofkën ‘Zenica’, gjatë kohës së bombardimeve të NATO-s mbi caqet serbe ishte dërguar në Dubravë si i burgosur, por aty i ishte dhënë një armë e kishte marrë pjesë në ekzekutimin e të burgosurve shqiptarë.
Në periudhën e luftës në Kosovë, ai kishte përfunduar në Burgun e Dubravës, ku serbët e dënuar me dënime të rënda, përfshirë dënime kapitale, kishin marrë një ofertë: të vrisnin shqiptarë të burgosur aty në këmbim të lirës.
Ai, bashkë me ekzekutorë të tjerë, lidhen me dyshimet për vrasjen e 95 shqiptarëve.
Atë fort mirë e kujton Dëfrim Rifaj, që bashkë kishin ndarë edhe burgun e Nishit e edhe atë të Dubravës.
Rrethanat e çuditshme që kanë quar në ekstradimin e tij nga Spanja në Bosnjë e Hercegovinë, nuk e gëzojnë atë, pasi sipas tij, i njëjti do të duhej të ballafaqohej me krimet e kryera në Kosovë.
“Emrin e tij le se e kam dëgjuar, por edhe e kam njohur personalisht, sepse ka qenë i dënuar dhe vuajtjen e dënimit e ka pasur në Burgun e Nishit. Kemi qenë bashkëvuajtës. Ka qenë ordiner, i burgosur kriminel, me plot kuptimin e fjalës. Me fillimin e bombardimeve merret vendim që ata me dënim me vdekje dhe të përjetshëm të sillen në Kosovë. E njoh mirë. E kam pas dy hapa para kur na kanë qit në pushkatim”, ka thënë Dëfrim Rifaj, i mbijetuar i Masakrës së Dubravës.
Emri i tij është i njohur edhe për të mbijetuarit e tjerë të Masakrës së Dubravës, por dënimi i tij eventual, nuk është i mjaftueshëm për disa prej tyre, meqë urdhërdhënësit vazhdojnë të mbeten të lirë.
“Emrat e përveçëm, për mua si një i mbijetuar nuk do të thonë asgjë, për shkak se procesi është shumë më i ndërlikuar. Do duhej të ketë një qasje tjetër, për shkak se përgjegjësit kryesorë për organizmin e kësaj masakre, dhe ekzekutimin e kësaj masakre nuk po përmenden fare, pra është vijë institucionale e Serbisë”, ka deklaruar deputeti Enver Dugolli.
Përderisa në duar mban listën me 200 emrat e kriminelëve të Masakrës së Dubravës, i mbijetuar Nait Hasani tregon se dënim s’kanë marrë as 1% e tyre, por që shpresën e ka akoma.
“ Janë dy raste. Një rast është në Prishtinë një gardian që ka marrë pjesë në torturat tona të të burgosurve, drejtpërdrejt në burgun e Prishtinës dhe të Lipjanit. Ai është i arrestuar, dhe të njëjtën kohë gardiani i Dubravës, Gagi. Pra vetëm këto dy raste i kemi nga 190 raste tjera që janë, të pjesëmarrësve që në forma të ndryshme kanë torturuar, vrarë dhe masakruar në Dubravë, bashkë me ushtrinë policinë dhe të burgosurit serbë që kanë qenë”, është shprehur Nait Hasani më herët për rtv Dukagjinin.
Përveç si pjesëmarrës në masakrën e Dubravës, në maj të vitit 1999, Petriq, lidhet edhe me rrethanat e pandriçuara të vrasjes së të rinjve serb në kafeterinë Panda, për të cilin kishte pasur tentime që të fajësohen shqiptarët.
Ekstradimi i tij drejtë Bosnjes, për vuajtje të pjesës së mbetur të dënimit për krim të organizuar e një arsenal armësh që i ishte kapur në Spanjë, pritet që të bëhet në muajin e ardhshëm.
Por mediat boshnjake, kanë paralajmëruar për mundësinë që ai pas një kohe të shkurtër, të përfundojë sërish në liri, pavarësisht pretendimeve për krime të rënda që rëndojnë mbi të.
