Ministria e Mjedisit, Planifikimit Hapësinor dhe Infrastrukturës (MMPHI), në bashkëpunim me UN-Habitat, kanë mbajtur simpoziumin me temën “E ardhmja e Planifikimit Territorial në Kosovë”.
Kryeministri i Kosovës, Albin Kurti, i cili ka marrë pjesë në këtë simpozium ka deklaruar se qytetarët dëshirojnë një jetë aktive me ajër të pastër dhe transport të integruar, pasi që siç thotë ai vetëm kështu zhvillohet territori.
“Njerëzit duan qytetet aktive me ajër të pastër, me transport të integruar. Njerëzit tanë dëshirojnë të kenë afër shërbimet që u nevojiten shkollat, çerdhet për fëmijë. Ky simpozium është i rëndësishëm për t’i hapur rrugë zhvillimit të diskursit mbi territorin” ka thënë Kurti.
Kurse Ministri i MMPHI-së, Liburn Aliu, ka prezantuar disa prej planeve hapësinore të nivelit qendror dhe lokal.
“Tash jemi në një pikë kur duhet të marrim vendime, por këto vendime nuk vinë thjesht nga politika, por duhet të diskutojmë dhe të takohemi dhe vendimet do të dalin nga debatet. Në draftin e kemi planin hapësinor për Bjeshkët e Nemuna” ka thënë Aliu
Koordinatorja për Zhvillimi e OKB-së në Kosovë Ulrika Richardson tha se Kosova ndodhet në një fazë që ka aspirata për planifikimin hapësinor.
“Kjo është baza për ndryshim dhe transformim, dhe Kosova është në momentin që ka aspirata dhe planifikimi hapësinor do të jetë njëra nga mjetet më strategjike për të arritur këtë” ka thënë ajo.
