Fatmir Limaj në foltore të Kuvendit, në prapavijë Albin Kurti. Foto nga arkivi
Kryeministri i dorëhequr, Albin Kurti, ka bërë të ditur se arsyeja kryesore pse nuk u arrit një marrëveshje me Nismën e Fatmir Limajt ishte se sipas tij, “Çeliku” këmbënguli në marrjen e pozitës së kryeparlamentarit.
Kurti tha se një kërkesë e tillë do ta dëmtonte koalicionin ekzistues që VV-ja e ka me Guxo dhe Alternativën.
“Unë kam pasur takime me kryetarin Limaj, takimet kanë kaluar në një atmosferë ku është rritur besimi, mirëbesimi, vullneti për të bashkëpunuar, mirëpo nuk ka pasur marrëveshje, thjesht për shkak të insistimit si shkak i një parakushti për bashkëpunim në të ardhmen me pozitën e kryeparlamentarit”.
“Unë jam në koalicion me partinë Guxo e Alternativa. Guxo i ka 6 deputetë e një partie me 3 deputetë t’ia japim kryeparlamentarin kur e ka koalicionin me një parti qe e ka dyfishin për nga numri i deputetëve, kjo e dëmton arkitekturën paraprake”, tha Kurti në RTK, transmeton Klankosova.tv.
Tutje, ai u shpreh se hyrja e Nismës në koalicion parazgjedhor me AAK-në, ia ka mundësuar kësaj të fundit që të jetë sërish në kuvend dhe ta kalojë pragun zgjedhor.
