Kandidati i Lëvizjes Vetëvendosje për kryeministër, Albin Kurti dhe ish-ministri i Shëndetësisë, Arben Vitia, kanë pritur sot në takim ambasadoren e Luksemburgut në Kosovë, Natacha Gomes,
Në një komunikatë për media, LVV njofton se Kurti i ka thënë Gomes se detyra e parë e qeverisë së tij do të jetë menaxhimi i pandemisë dhe sigurimi i vaksinës antiCOVID.
“Ai theksoi se detyra e parë e ekzekutivit do të jetë menaxhimi me pandeminë, përkatësisht sigurimi sa më i shpejtë dhe në sasi sa më të madhe i vaksinës kundër Covid-19, për të cilën ripërsëriti që Kosova llogaritë në shtetet mike për ndihmë në atë drejtim”, citohet të ketë thënë Kurti.
Tutje, në këtë kumtesë bëhet e ditur se i pari i VV-së, i cili pritet që shumë shpejt ta marrë udhëheqjen e ekzekutivit, ka thënë se prioritet i qeverisë së tij do të jetë edhe çështja e punësimit dhe e drejtësisë, si dhe luftimi i krimit dhe korrupsionit në qendër.
“Progresi në këto fusha është i domosdoshëm për një shtet të qëndrueshëm dhe funksional”, citohet të ketë thënë lideri i VV-së.
