Ministria e Punëve të Jashtme dhe Diasporës e Kosovës ka rikthyer vëmendjen te ndërtimi i një kishe serbe në Batajnicë të Beogradit, një kompleks ku është një varrezë masive e 700 shqiptarëve të vrarë më 1999, duke e dënuar këtë akt si përçmim ndaj të gjithë këtyre viktimave.
Arben Rugova nga kjo ministri tha për klankosova.tv se kjo ngjarje duhet të mbetet në vëmendje vazhdimisht, prandaj edhe kanë reaguar edhe sot, disa vjet pas ndërtimit.
“Ministria e Punëve të Jashtme dhe Diasporës e Republikës së Kosovës (MPJD) e dënon aktin e ndërtimit të Kishës Ortodokse Serbe në Batajnicë, pranë lokacionit ku u gjetën në varrezë masive trupat e mbi 700 shqiptarëve të vrarë në vitin 1999 nga forcat ushtarake dhe policore të Serbisë”, thuhet në reagim.
“E konsiderojmë këtë një akt përçmimi të kishës dhe autoriteteve serbe ndaj viktimave shqiptare të këtij akti gjenocidal të Serbisë. Në vend të ndërtimit të një pllake përkujtimore ndaj viktimave të pafajshme të varrosura në këtë vend ku ishin përpjekur ta fshihnin krimin shtetëror, Serbia vazhdon të provokojë me akte të tilla, si dhe refuzon të tregojë për fatin edhe të mbi 1600 shqiptarëve të tjerë të zhdukur gjatë luftës”.
MPJD thotë se nuk mund të ketë asnjë marrëveshje paqeje e pajtimi mes Kosovës e Serbisë, derisa kjo e fundit nuk i pranon krimet e bëra ndaj shqiptarëve në Kosovë dhe derisa nuk kërkon falje për këto krime, duke i ndjekur dhe dënuar shumë nga kriminelët e luftës që i ka amnistuar, njofton Klan Kosova.
“Njohja e pavarësisë së Kosovës nga Serbia do të jetë më e lehtë për të kur ajo të bëhet edhe si reflektim e pendim i Serbisë për krimet e kryera ndaj popullit të Kosovës”.
Projekti për ndërtimin e kësaj kishe kishte filluar më 2011, ndërsa autoritetet e Kishës Ortodokse Serbe kishin bekuar të gjithë ata që kontribuan në ndërtimin e kishës, e cila u përfundua më 2013. Atriumi i Kishës Ortodokse Serbe Irinej kishte dekoruar edhe disa prej tyre.
