Për një muaj në Kosovë janë regjistruar, 387 raste me covid-19
Me datën 13 mars, në Kosovë u shënuan dy rastet e para me COVID-19. E një muaj më pas, numri i të prekurve me virusin korona, është rritur.
Instituti Kombëtar i Shëndetësisë Publike ka njoftuar se janë shtuar edhe 10 raste të reja me COVID-19 dhe numri i përgjithshëm në Kosovë ka shkuar në 387.
Rastet e reja janë 2 nga Prishtina, 2 nga Vitia, fshati Smirë dhe Skifteraj, 1 nga fshati Talinovc i Ferizajit, 1 nga fshati Hodonoc i Kamenicës, 1 nga fshati Burojë e Skënderajt, 1 nga Suhareka, 1 nga Gjakova dhe 1 nga Zveçani.
Po ashtu lajm i mirë është se 3 persona që kishin koronavirusin janë shëruar tashmë dhe janë liruar për në shtëpi.
Postimi i plotë nag IKSHPK:
Sot më 14 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 137 mostra të marra nga Klinika Infektive, gjurmimi i kontakteve të rasteve në terren si dhe nga karantina në Qendrën studentore.
Me SARS-CoV-2, pozitiv sot janë diagnostikuar gjithsej dhjetë (10) raste.
Rastet pozitive janë raste kontakti, dy (2) raste me vendbanim në Prishtinë, dy (2) raste nga komuna e Vitisë (sipas vendbanimit një (1) rast Smirë dhe një (1) rast Skifteraj) dhe me nga një (1) rast vendbanimet: Talinovc-Ferizaj, Hodonovc-Kamenicë, Burojë-Skenderaj, Suharekë, Gjakovë dhe Zveçan.
Dje më 14 prill 2020, janë shëruar edhe tre (3) pacient, bazuar në rekomandimet e OBSH-së ku dy mostra rezultojnë negative me së paku një ditë distancë kohore. Numri i përgjithshëm i të shëruarve deri më sot është gjithsej gjashtëdhjetë e gjashtë (66).
Nga data 08 shkurt deri më 14 prill 2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 3.547 mostra të dyshimta në virusin SARS-CoV-2 dhe prej tyre, pozitive rezultojnë gjithsej treqind e tetëdhjetë e shtatë (387) me 8 raste të vdekjes të cilët kanë pasur sëmundje të tjera shoqëruese.
Në IKSHPK në vazhdimësi përgjatë 24 orëve janë duke u kontaktuar dhe mbikëqyrë të gjitha kontaktet e rasteve, si dhe kontaktet e kontakteve duke iu obliguar për vetëizolim dhe të kërkojnë ndihmë mjekësore nëse kanë simptome. Deri më sot janë kontaktuar dhe janë nën mbikëqyrje 5.153 kontakte të rasteve.
Në nivel global, nga data 31 dhjetor 2019 deri më 14 prill 2020 sipas Ëorldometers, janë raportuar gjithsej 1.985.135 raste të COVID-19 dhe 125.344 raste të vdekjes.
