“Dita e Falenderimeve” (“Thanksgiving Day”) në Amerikë ka nistuar prej nga koha e Xhorxh Uashingtonit (1789), e ringritur nga Linkolni gjatë “Luftës Civile”(1875) dhe e shpallur “Festë Kombëtare” nga Franklin Roosevelti (1941) festohet të enjten e katërt të nëntorit të cdo viti kalendarik.
Presidenti Amerikan, Joe Bajden, sipas traditës presidenciale amerikane, i ftoi, edhe sivjet, në një ceremoni solemne e festive në Shtëpinë e Bardhë, një grup të vogël rinor me gjimnazistë e studentë të përzgjedhur amerikanë, ku në mes tyre ishte edhe 13 vjecarja emblematike. Zana Pinchotti nga Uashington D.C, kryeqyteti i Amerikës.
Zana Pinchotti e pati nderin e vecantë e privilegjin e lartë të jetë në rreshtin e parë të kësaj ceremonie protokollare presidenciale, e cila ishte e para që, në këtë “Ditë të Falenderimeve”, e përshendeti dhe i shtrengoi duart pas ceremonisë me Presidentin Amerikan Joe Bajden.
Prej nga “Koha Linkoliane”, në “Ditën e Falenderimeve” në Amerikë, gjeli i detit është ushqimi kryesor në tryezat festive familjare e zyrtare, aqsa shpesh herë tashma i thonë edhe “Dita e Gjelit të Detit”.
Në Amerikë, gjelat e këtij viti, në “Ditën e Falenderimeve”, u pagëzuan me emrat Liberty dhe Bell.
-Këta gjela deti kanë një vlerësim të ri për fjalën, “Le të kumbojë liria”,- u tha Presidenti Amerikan Joe Bajden, fëmijëve pjesmarrës në këtë ditë feste kombëtare në Shtëpinë e Bardhë, ku ishte dhe stafi presidencial, antarët e kabinetit të tij.
13 vjecarja Zana Pinchoti është fëmija i dytë dhe vajza e dytë e dy prindërve të nderuar në shërbim elitar, tërësor e lartnor, ndaj Amerikës;
Ajo është vajza e ushtarakut e qytetarit amerikan David J. Jr. Pinchotti – oficer i Marine Corps të Shteteve të Bashkuara të Amerikës.
Ajo është vajza e Besa Tafilaj Pinchottit– Drejtore Ekzekutive e Organizatës së Familjeve të Ushtarakëve të Amerikës (NMFA) dhe, ndërvite, një gazetare e njohur e ekranit dhe e terrenit, folëse (spikere) dhe autore e disa emisioneve (edhe për Kosovën e (pas)Luftës së fundit të saj) në rrjetet e mëdha televizive amerikane TV ABC dhe TV NBC.
Zana Pinchotti është një nxënëse e nderuar e klasës së 8-të në Shkollën Eliot-Hine në Uashington D.C., e përkushtuar ndaj studimeve të lëndëve mësimore dhe në veprimtaritë jashtëshkollore, sidomos ndaj sporteve.
Sportistja e re, Zana, është në ekipin e futbollit të shkollës së saj, por edhe në atë të Prefekturës Uashington D.C.. Konkuroi në Kampionatin Shtetëror në të dyja ekipet e futbollit.
Zana Pinchotti luan si sulmuese për ekipin e futbollit ECNL, Arlington Soccer Association dhe ka përfaqësuar Shtetet e Bashkuara të Amerikës në turne nëpër këtë shtet federal euro-atlantik dhe në Europë.
Zana Pinchotti, në genet e saj ka dhe gjak shqiptar, është mbesë shqiptare, andaj ka lidhje të forta me kulturën shqiptare.
E ka fort për zemër kuptimin e emrit të saj të bukur. Shpesh herë, teksa rrijnë së bashku, i kërkon gjyshit të saj të mirë, Ramiz Tafilaj, t’i tregojnë historinë e emrit të saj, që vjen nga kohërat, rrjedh nga legjendat e mocme. Zana është një figurë mitologjike shqiptare, e cila thuhet se fillimisht ka qënë një Hyjni, përndryshe edhe një Perëndeshë Ilire, sikurse Artemisa e lashtë greke, Diana romake, Bendisi thrakë. E, kështu, Zana, si e tillë, legjendarohet si personifikim i Hënës, Zonja e Pyjeve, Mbrojtëse e Kafshëve, Roje e Burimeve dhe e Përrenjëve, Mbrojtëse e Grave, Shpërndarëse e Sovranitetit.
Zana e përfaqëson më së miri trashëgiminë e saj shqiptare në Ditët MultiKulturore të Shkollës së saj, Ajo, e veshur me veshje tradicionale shqiptare, përpiqet me përkushtim për t’iu mësuar shoqeve e shokëve të klasës të kërcejnë valle shqiptare, iu bën të njohura ushqimet e saj të preferuara shqiptare.
Në se e pyetën Zana Pinchottin, se cila është festa e saj më e preferuar, ajo do të thotë menjëherë, natyrshëm e përplot gëzim: “Dita e Falenderimeve”, sepse është është me të gjithë Familjen e saj pesë antarëshe në Huoston të Teksasit në SHBA, ku edhe e feston 28 Nëntorin, Ditën e Pavarësisë Kombëtare Shqiptare.
Sportistes Zana Pinchoti i pëlqen të veshin fanellën e sportistit profesionist, Lorik Cana, ish-futbollist i njohur i kombëtareve shqiptare, zvicerane e franceze.
Zana Pinchotti, kjo mbesë shqiptarëve e Tafilajve të historisë kombëtare shqiptare, e ka vizituar shpesh, rregullisht, Kosovën dardane dhe Shqipërinë Londineze. Vendi i saj i preferuar për ta vizituar në Kosovë është fshati Dubravë, prej nga vjen dhe Familja e saj, prej nga është gjyshi i saj, Ramiz Tafilaj, atdhetar, humanist, biznesmen, botues, kulturolog, që tani jeton e veprimtaron në mes Amerikës dhe Kosovës, edhe në Shqipëri, edhe në Maqedoninë Veriore, edhe në Malin e Zi, edhe në Kroaci.
Zana e kujton me mallë të madh e dashuri të thellë xhaxhain e saj të ndjerë, Tafil Tafilaj, kur ajo ishte e vogël dhe mblidhnin sëbashku lule dhe fruta në kopshtin e shtëpisë, në Dubravë të Decanit.
Zana ka një motër më të madhe, Lirën dhe një vlla më të vogël, Lorikun.
Të tre me emra të bukur shqiptar.
Zana Pinchotti i ka edhe dhjetë kushërinj të saj: Dia, Noah, Delvina, Andrra, Drini, Vera, Iliri, Nathan, Roman dhe Julian, me të cilët ia kalon shumë mirë dhe rriten me dashuri për njëri-tjetrin, për Amerikën, për Kosovën e Shqipërinë.
Kur bisedon, ndonjëherë, me Zana Pinchottin e Uashingtonit e Teksasit, e Kosovës e Shqipërisë, ajo të thotë në shqip, duke e ngritë zërin:- “Unë jam Zana e Malit!”
E, kjo Zana me emër legjende, me emër hyjnor, me emër mbretëreshe ilire, ishte në “Ditën e Falenderimeve” në Shtëpinë e Bardhë, ku u përshendet dhe u takua me Presidentin e Amerikës, Joe Bajden, mikun e madh të Shqiptarëve.
Shkruan: Rami Lushaj
