Pascale Ferrier, nga Quebecu, u arrestua të dielën në një vendkalim kufitar në Buffalo, New York. Zyrtarët thonë se ajo mbante një armë.
Letra që ajo dyshohet se kishte dërguar javën e kaluar u zbulua para se të mbërrinte në Shtëpinë e Bardhë.
Në të, ajo i bënte thirrje që z. Trump të hiqte dorë nga gara presidenciale në SHBA. Zarfi përmbante ricinë, një helm që gjendet natyrshëm në fasulet e ricinit.
“Gjeta një emër të ri për ty:” Klouni i shëmtuar”, shkroi ajo në letrën drejtuar z. Trump, sipas dokumenteve të akuzës të FBI-së të paraqitura përpara saj në gjykatë të martën ,në New York.
“Shpresoj që të të pëlqejë. Ti shkatërron SHBA-në dhe i çon në katastrofë. Unë kam kushërinj në SHBA, atëherë nuk dua 4 vjetët e ardhshëm me ju si president. Hiqni dorë dhe hiqni aplikimin tuaj për këto zgjedhje.”
Letra, për të cilën FBI-ja thotë se kishte shenjat e gishtërinjve të saj, i referohej shënimit të helmuar si “një dhuratë e veçantë”, duke shtuar: “Nëse nuk funksionon, unë do të gjej recetë më të mirë për një helm tjetër, ose mund të përdor armë kur do të jem në gjendje të vij “.
E dyshuara mund të ketë dërguar ricinin në pesë adresa në Teksas, duke përfshirë një burg dhe një zyrë sherifi, sipas dokumenteve të gjykatës.
Zonja Ferrier u paraqit në gjykatë të martën pasdite në Buffalo, New York, me ndihmën e një përkthyesi frëngjishtfolës, sipas mediave lokale.
Ajo kërkoi një avokat mbrojtës të caktuar nga gjykata gjatë seancës. Gjykatësi caktoi seancën e ardhshme më 28 shtator.
