Këshilltari i Kryeministrit të Kosovës Almir Veliji, nëpërmjet një komenti në llogarinë e kryetares se SDU dhe deputetës Duda Balje në Facebook, ka sulmuar në baza fetare Emanuel Demajn, Kryeredaktor i Agjencisë së Lajmeve Kosova.info
Duhet t’ia kujtojmë fillimisht z. Veliji se në bazë të Nenit 4 (Mbrojtja me Kodin Penal, pika 4.1): “E drejta për të manifestuar fenë ose besimin nuk mund të abuzohet nëpërmjet nxitjes, ngacmimit, ose provokimit të jo tolerancës ose urrejtjes nacionale, fetare ose racore, duke kërcënuar të drejtën për të jetuar, të drejtën për shëndet fizik dhe mendor, të drejtat për fëmijë ose të drejtën për të respektuar integritetin privat dhe familjarë”; duke qenë kjo një e drejtë e garantuar, sipas pikës tjetër në vijim (4.2): “Sulmi ndaj çfarëdo zyrtari fetar, shkatërrimi ose dëmtimi i ndonjë vendi ose objekti fetarë, ose prone tjetër e ndonjë Bashkësie fetare, ashtu si edhe ndonjë akt ose aktivitet që ka për qëllim të shkaktojë, nxis, ose provokojë urrejtje fetare, është i ndëshkueshëm në bazë të Kodit të Përkohshëm Penal të Kosovës.”
Veliji, i cili, siç e thamë, është Këshilltar i Kryeministrit Avdullah Hoti, vjen nga Partia SDU e Duda Balje, e cila është arsyeja e vërtetë e këtij sulmi. Siç kemi raportuar, kjo e fundit është lëshuar në një fushatë të egër kundër mediumit tonë (Kosova.info), duke thyer dhe shkelur çdo parim, duke e keqpërdorur edhe pozitën e saj zyrtare.
Kosova.info dënon ashpër këto sulme dhe etiketime të cilat po i bënë deputetja Duda Balje bashkë me përkrahësit tjerë, ndaj gazetarëve të Agjencisë së Lajmeve Kosova.info. Këto linçime, komente, etiketime janë të papranueshme, jo etike dhe të ndëshkueshme (siç e thamë më sipër), me ligje të Kosovës, të gjitha këto ofendime dhe fyerje ne baza fetare po bëhen në profilin e Kryetares së Komisionit për të Drejtat e Njeriut, Barazi Gjinore, për Persona të Pagjetur, Duda Balje.
Vëmë në dukje që kjo fushatë e egër e orkestruar po vjen si pasojë e të gjeturave të gazetarëve tanë investigativë në lidhje me një rast skandaloz, ku e dyshuara kryesore është deputetja Duda Balje. Kjo e fundit në vend që t’u përgjigjet pyetjeve të cilat gazetarët tanë ia kanë dërguar në lidhje me çështjen në fjalë, ka zgjedhur rrugën e presionit, linçimit publik dhe ofendimeve ndaj tyre dhe drejtuesve të mediumit tonë.
Me këtë reagim duam të trokasim fillimisht në dyert e Kryeministrit Avdullah Hoti, nga i cili kërkojmë të veprojë pa u hamendur. Ai duhet të marr masa të menjëhershme ndaj këshilltarit të tij, i cili i ka bërë këto shkelje flagrante, duke përdorur një gjuhë të papranueshme – ofenduese ndaj tërë komunitetit katolik. (E themi këtë sepse sulmi në baza fetare ndaj Kryeredaktorit Demaj, është edhe sulm ndaj një komuniteti të tërë, meqë Demaj vjen nga një parti e cila në një mënyrë është bashkudhëtare e LDK-së që nga themelimi i saj nga viti i largët 1990).
Në të kundërtën, kreu më i lartë i shtetit, do të sinkronizohet me vartësit e tij, që dalin të jenë shpërdorues të pozitave zyrtare, respektivisht shkelës të të drejtave dhe lirive të njeriut.
