Prokuroria në Ferizaj kërkon paraburgim për shoferin që godit për vdekje dy fëmijë në Carralevë të Shtimes.
“Prokuroria Themelore në Ferizaj, Departamenti i Përgjithshëm, ka paraqitur kërkesë për caktimin e masës së paraburgimit në Gjykatën Themelore në Ferizaj, kundër të pandehurit V.M., i cili gjendet në ndalim që nga data 09 Maj 2021”, thuhet në komunikatën për media nga Prokuroria Themelore në Ferizaj.
Mes tjerash në komunikatë thuhet se “Sipas kërkesës së prokurorisë, ekziston dyshimi i bazuar se i njëjti me datë 09 Maj 2021, në rrugën Ferizaj- Shtime, në fshatin Carralevë, derisa ishte drejtuar automjetin e tipit “Volkswagen Golf” nga pakujdesia, ka shkelur ligjin mbi trafikun publik, ka rrezikuar jetën e njerëzve, duke vepruar në kundërshtim me dispozitën e nenit 53.1 të Ligjit për Rregullat e Trafikut Rrugor, ku i njëjti nuk ia ka përshtatur shpejtësinë e lëvizjes së automjetit kushteve në rrugë, ashtu që godet dy fëmijët, tani të ndjerët, të cilin ishin jashtë rrugës, ku me ç’rast ka kryer veprën penale “Rrezikimi i trafikut publik” nga neni 370 paragrafi 9 lidhur me paragrafin 6 të Kodit Penal të Republikës së Kosovës (KPRK)”.
Aksidenti kishte ndodhur më 09 maj rreth orës 16:12.
Sipas Policisë së Ferizajt, deri tek aksidenti dyshohet të ketë ardhur kur një automjet i udhëtarëve gjatë lëvizjes për shkak të mosrespektimit të shpejtësisë, ka humbur kontrollin dhe ka kaluar në shiritin e kundërt duke i goditur për vdekje dy këmbësorët në trotuar.
“Si pasojë e këtij aksidenti të komunikacionit, fillimisht lëndime të rënda trupore marrin dy këmbësorët, të cilët pasi marrin ndihmën e parë mjekësore në QKMF-Shtime, dërgohen në QKUK-Prishtinë për tretman të mëtutjeshëm mjekësor. Më pas, të dy këmbësorët nuk kanë mundur ti mbijetojnë lëndimeve të rënda trupore dhe kanë ndërruar jetë në QKUK-Prishtinë”, thuhej në komunikatën e Policisë.
