Pak pas rifillimit të sulmeve ajrore ushtria izraelite ka filluar një operacion tokësor në Rripin e Gazës. Ushtria tha se synon të krijonte përsëri një “zonë tampon”.
Ushtria izraelite ka nisur një operacion të ri tokësor në Rripin e Gazës. Sipas njoftimit të forcave të armatosura operacioni “i kufizuar” në veri të zonës bregdetare synon të krijojë një “zonë tampon” midis veriut dhe jugut të zonës. Trupat tokësore kanë zgjeruar si pjesë të ofensivës edhe kontrollin e tyre në të ashtuquajturin Korridori Netzarim. Ky korridor ndan brezin bregdetar në gjysmën veriore dhe atë jugore. Ushtarët izraelitë njoftohet se kanë përparuar deri në mes të korridorit.
Izraeli kishte rifilluar më parë sulmet ajrore, duke thyer kështu armëpushimin që kishte qenë në fuqi që nga mesi i janarit. Gjatë armëpushimit dhjetëra-mijëra palestinezë u kthyen në shtëpitë e tyre në veri të rajonit bregdetar.
Kryqi i Kuq jep alarmin
Komiteti Ndërkombëtar i Kryqit të Kuq paralajmëroi se gjatë 36 orëve të fundit numri i të lënduarve është rritur ndjeshëm për shkak të rifillimit të operacioneve tokësore. Për shkak të pezullimit të ndihmave humanitarenë zonën bregdetare, rezervat e furnizimeve mjekësore kanë rënë ndjeshëm.
Përveç kësaj personeli i spitalit po lufton për të përballuar rritjen e madhe të numrit të viktimave, tha Kryeqi i Kuq. Thuhet se vetëm sulmet ajrore të fundit mund të kenë shkaktuar qindra të vdekur – Ministria e Shëndetësisë, e kontrolluar nga organizata terroriste Hamas, raportoi për më shumë se 400 viktima, ndër të cilat shumë gra dhe të mitur. Gjatë sulmeve u plagosën më shumë se 560 vetë.
Izraeli kërkon lirimin e pengjeve të mbetura
Ministri izraelit i Mbrojtjes, Israel Katz, njoftoi gjithashtu se së shpejti do të ketë evakuime të palestinezëve nga zonat e luftimit në Rripin e Gazës. Izraeli po përgatitet të zgjerojë ofensivën e tij të re ushtarake, tha Katz.
Nëse Hamasi nuk i liron pengjet e mbetura izraelite, “Izraeli do të veprojë me një intensitet që nuk e keni parë kurrë më parë,” tha Katz. Sipas ushtrisë izraelite 34 prej pegjeve thuhet se kanë vdekur. /DW
