Pas deklaratave të Hamasit dhe presidentit amerikan, Donald Trump lidhur me propozimin amerikan për t’i dhënë fund luftës në Gaza dhe për lirimin e pengjeve, Forcat Mbrojtëse të Izraelit (IDF) njoftuan se Shefi i Shtabit, Gjenerallejtënant Eyal Zamir, është takuar me gjeneralët më të lartë për një “vlerësim të posaçëm të situatës në dritën e zhvillimeve”.
Në një deklaratë të ushtrisë thuhet se “sipas urdhrit të nivelit politik”, Zamir u ka kërkuar Forcave Mbrojtëse të Izraelit që të përgatiten “për zbatimin e fazës së parë të planit të Trump për lirimin e pengjeve”, pa dhënë detaje se çfarë përfshin saktësisht ky urdhër, raporton timesofisrael.
Deklarata gjithashtu duket se konfirmon raportimet se liderët politikë i kanë urdhëruar IDF-së të ndalojë ofensivën për marrjen e qytetit të Gazës dhe në vend të saj të përqendrohet në operacione mbrojtëse, duke theksuar se “siguria e forcave tona është me rëndësi supreme dhe të gjitha kapacitetet e IDF-së do t’i caktohen Komandës së Jugut për mbrojtjen e trupave tona”.
“Shefi i shtabit theksoi se, për shkak të ndjeshmërisë operative, forcat duhet të tregojnë një gatishmëri dhe vetëdije të shtuar. Po ashtu, u theksua nevoja për një reagim të shpejtë për të neutralizuar çdo kërcënim”, shtohet në deklaratë.
Kjo informatë vjen pas një video-mesazhi të presidentit amerikan, Donald Trumpit, në të cilin ai i ka dërguar një thirrje Izraelit që të ndalojë bombardimet në Gazë, pasi që Hamasi ka pranuar propozimin e presidentit amerikan për t’i dhënë fund luftës në Gazë.
Radioja ushtarake izraelite raportoi se urdhri kërkon që operacionet të reduktohen në minimum, dhe që trupat në terren të kryejnë vetëm të ashtuquajturat “manovra mbrojtëse”.
Ky urdhër u dha pas bisedimeve gjatë natës midis zyrtarëve izraelitë dhe atyre amerikanë.
