Sot është mbajtur takimi i parë i Grupit Punues për Institutin për Krimet e kryera gjatë luftës në Kosovë, i cili do të merret me hartimin e koncept dokumentit për themelimin e mekanizimit, që do të dokumentojë krimet të cilat janë kryer në Kosovë.
Në takimin e parë ka marrë pjesë edhe Kryeministri i Kosovës, Albin Kurti, i cili ka deklaruar se Instituti do të themelohet në bazë të ligjit dhe do të ketë linjën buxhetore dhe përkrahjen e shtetit. Ai ka thënë se viktimat presin drejtësi.
“Njerëzit janë të lodhur viktimat kanë humbur besimin në sistem dhe gjeneratat po vdesin besa përditë dhe kështu po humbet kujtesa primare e luftës. Ky është rrezik primar që po na kanoset. Të adresohet çfarë ka ndodhur sepse kemi 13 mijë persona të vrarë, mijëra të përdhunuar, mijëra të burgosur e torturuar. Kemi përjetuar dëme shkatërruese dhe asnjëherë nuk i kemi matur taman. Nuk kemi asnjë shifër për dëmin ekonomik që i është shkaktuar Kosovës” ka thënë ai.
Kurse Ministrja e Drejtësisë, Albulena Haxhiu, ka deklaruar se nga buxheti i shtetit do të alokohen mjete për rekrutimin e prokurorëve, të cilët do të merren me ndjekjen e krimeve të luftës.
Në mes tjerash, Haxhiu tha se është në ndryshim edhe Kodi Penal për gjykimet në mungesë.
“Do të ndahet buxhet për Prokurorinë Speciale me qëllim që të rritet numri i prokurorëve edhe për 4 prokurorë të tjerë dhe 6 bashkëpunëtor profesional e 2 përkthyes” ka thënë ajo.
