Ia gjejnë 30 kilogramë marihuanë në veturë, arrestohet një person në Vërmicë

Policia e Kosovës ka arrestuar një 40-vjeçar, me inicialet F.M., në pikëkalimin kufitar në Vërmicë për shkak se dyshohet që ka kryer veprën penale “Blerja, posedimi, shpërndarja dhe shitja e paautorizuar e substancave psikotrope dhe analoge”, 

Sipas njoftimit të Policisë, gjatë kontrollit të veturës në rrotën rezervë, është detektuar një sasi e marihuanës me peshë rreth 30 kilogramë, e cila është sekuestruar.

“Bazuar në bashkëpunimin e Drejtorisë për hetimin e trafikimit me narkotik dhe Policisë Kufitare të Kosovës automjeti i potencuar është selektuar për kontroll të vijës së dytë nën dyshimin e posedimit të substancave narkotike.

Asistencë relevante për identifikimin e substancës narkotike ka ofruar edhe Policia Kufitare e Republikës së Shqipërisë me që rast, nën rrotën rezervë në bagazh është detektuar një bunker i dyshuar. Autoritete kufitare të PK-së kanë vazhduar me kontroll të mëtutjeshëm ku edhe është hasur në një sasi të substancës së dyshuar narkotike e llojit marihuanë me peshë rreth 30kg (tridhjetë kilogram)”, thuhet ndër të tjera në njoftimin e PK-së.