Hoti zbulon një kërkesë të Kurtit që u bë shkak për rrëzimin e Qeverisë

Hoti ka thënë se ‘mollë sherri’ mes tyre, u bë kërkesa që ministrat të angazhohen në mbledhjen e fakteve për të dërguar në Prokurori.

“Dhe një moment që duhet ta them ndoshta nuk e kam thënë asnjëherë publikisht, në tryezën që kemi pasur si kabinet qeveritar në Prevallë, në përgatitje të planit të punës, e kishim programin qeverisës, do ta finalizonim atë, dhe punonim që të vendosnim objektivat kryesore në 100 ditët e para të qeverisjes. Në fund të takimit ishte kërkesa e tyre që të angazhohen ministrat për të mbledhur fakte për Prokurori. Për të dërguar çështjen në Prokurori. Njëra nga detyrat që iu kërku ministrave në fund të takimit ishte të mblidhen fakte për të dërguar në Prokurori”, ka thënë ai “N’Konak”.

Hoti ka deklaruar se LDK dhe LVV nuk janë pajtuar edhe në pika të tjera qeverisëse.

“Fillimi ka qenë i mirë, por mandej gjërat filluan të ndryshojnë. Ne jemi ndryshe, si LDK ne kemi kulturë tjetër të qeverisjes, ndoshta përsëritet shpesh por ne jemi me qasje më demokratike në vendimmarrje në qeverisje jo me qasje autokratike, nuk është vetëm një person që flet por ulemi diksitojmë. Pas disa jave ka ndryshu qasja në qeveri, duke u mbyll në kabinet dhe duke marrë vendime që nuk janë të pranueshme. Nëse vijnë momente që rendi i ditës nuk diskutohet me partnerin e koalicionit ti e sheh se ke problem për më tutje”, ka thënë Hoti.

Ai shtoi se nuk duhet të futen në qeveri gjërat që nuk janë në kompetencë të saj.