Nënkryetari i Lidhjes Demokratike të Kosovës dhe kreu i Komunës së Gjilanit, Lutfi Haziri thotë se ka disa kushte në rast se i kërkohet që të jetë kryeministri i ri i Kosovës, shkruan Gazeta Express.
Në një përgjigje për Gazetën Express, Haziri ka deklaruar se në rast se në parti i kërkohet që të pranojë të jetë i mandatuari për kryeministër, ka disa kushte, megjithatë s’ka pranuar të tregojë detaje se për çfarë kushte e ka fjalën.
“Unë kam kushte nëse më propozojnë” ka deklaruar nënkryetari i LDK’së, sot gjatë ditës për gazetën.
Deri më tani Haziri ka shtuar se partia e ka përzgjedhur kreun e LDK’së, Isa Mustafën për mandatar. Megjithatë, Mustafa ende nuk e ka pranuar këtë propozim të partisë.
Nëse Mustafa nuk pranon që të jetë kryeministër, atëherë ai do të zgjedhë dikë nga partia.
Për këtë çështje nesër do të mblidhet kryesia e Lidhjes Demokratike.
Mustafa i pyetur nga mediat, nuk është përgjigjur nëse e përjashton mundësinë për të qenë i nominuar. Ai ka thënë se pas mbledhjes së nesërme, do të njoftohen mediat e se vetë ka disa çështje personale.
“Para së gjithash duhet ta them në organet e LDK’së. Atje ne ta përfundojmë këtë dhe vullneti që del nga LDK’ja. Unë i kam disa çështje të miat personale për të cilat jam I kujdesshëm dhe dëshiroj që zgjedhja dhe përcaktimi për mandatarin të jetë në vullnetin e plotë të LDK’së”, ka thënë Mustafa.
