Haradinaj “thumbon” Kurtin: Kush është veteran i vërtetë

“Marsi i rikthen kujtimet dhe dhembjet e Luftës Çlirimtare. Të përulemi para të rënëve, të respektojmë kategoritë e lirisë”, ka thënë kryetari i Aleancës për Ardhmërinë e Kosovës, Ramush Haradinaj në Kuvendin e Kosovës, derisa ka folur edhe për “veteranët e rrejshëm”, një temë kjo e ngritur së fundi nga kryeministri Albin Kurti.

“Nuk e meritojnë ofendimin që bash në këtë kohë, me e fillu edhe njëherë me diskutimet se kush është veteran i vërtetë, apo jo; kush është luftëtar i vërtetë apo jo. Nuk është koha e tillë. Ka pasur edhe një proces gjyqësor. Tash është koha kur duhet t’i respektojmë e t’i nderojmë ata”, ka thënë Haradinaj në Kuvendin e Kosovës derisa ka aluduar në raportimet e Kurtit.

Derisa po fliste sot për masakrat dhe të vrarët në luftën e Kosovës, tha se familjarët e të rënëve dhe ata që kanë plagë të luftës presin një lajm të mirë nga institucionet kosovare, e që është rritja e pensioneve.

“Sot, edhe Qeveria, edhe institucionet e vendit, edhe të gjithë ne, kur iu dalim përballë fëmijëve, të vejave, nënave, familjarëve të rënë për liri, të gjithë atyre që u mungojnë të dashurit e vet, po edhe gjithë atyre që bartin plagët e luftës, atëherë ata meritojnë një lajm të mirë nga ne. Ata nuk e kanë lajmin e vetëm të mirë që e presin nga ne, që t’u rritën pensionet”, ka thënë Haradinaj.

Kryeministri i Kosovës, Albin Kurti, në takim me Organizatën e Veteranëve të Luftës të UÇK-së para pak ditësh, tha se janë dakorduar për bashkëpunim për pastrimin e listës së veteranëve.