Kreu i AAK-së, Ramush Haradinaj ka deklaruar se takimi i sotëm i liderëve politikë me presidenten Vjosa Osmani do ta bëjë të qartë se aktualisht në Kuvend nuk ekziston shumicë parlamentare, dhe se vendi po shkon drejt zgjedhjeve të reja.
“Pas dështimit të mandatarit dhe qeverisë së propozuar prej tij me votë, tani opsionale është një shumicë e re. Nëse nuk paraqitet kjo shumicë e re te presidentja, ku asnjëri prej nesh nuk e ka shumicën, atëherë presidentes i mbetet si opsion i vetëm shpallja e zgjedhjeve, janë të pashmangshme kësaj here”, ka deklaruar ai për EO.
Sipas tij, opozita ka numra, por mungon marrëveshja e brendshme.
“Ne kemi 52 deputetë shqiptarë, katër më shumë se sa Vetëvendosje, që i bie i kemi realisht mundësitë, por mungon një marrëveshje mes opozitës, edhe nuk e kemi shumicën, nuk kemi mandatar që e ka shumicën. Besoj që zgjedhjet po vijnë, pas zgjedhjeve të tjera nuk do të ketë vonesa, nuk do të vonohet Kosova, po presim që ajo që është vërtetuar që ‘Kurti 3’ nuk ndodhi, të jetë edhe perspektiva, të jetë rruga e re për Kosovën, të jetë qeveria e Kosovës”, tha Haradinaj.
