Ishte mysafir special i një organizimi të RTV Mitrovicës në fshatin Koshtovë të Mitrovicës, por kryeministri në largim, Ramush Haradinaj, ishte i pafat në ushqim.
Gjatë qëndrimit në këtë organizim, Haradinaj ndërroi disa llafe me kamarierin e restorantit para se të porosiste. Nuk ia doli të merrte atë që preferonte.
“Mish, nëse e keni këtë pulën e katundit, a bën”, pyeti Haradinaj, kamarierin, i cili i tha se “nuk shërbehet ky specialitet pa porosi”.
“Bën një biftek… e këso mish qingji a keni?”, vazhdoi Haradinaj, teksa vendosi të porosiste biftek.
Gjatë kësaj vizite në Koshtovë të Mitrovicës, kreu i Aleancës për Ardhmërinë e Kosovës ishte i interesuar edhe për lumin e Ibrit, që ndodhej pranë restorantit ku mbahej ngjarja.
“A keni peshq këtu”, e pyeti Haradinaj, pronarin e restorantit, sapo mbërriti në vendin e ngjarjes mëngjesin e së premtes.
